Read Lamnso Nsùyrì Nyùy 108 Bible Online

Nsùyrì Nyùy 108 - Lamnso bible

Nsùyrì Nyùy 108

¹[128] Rúrú, Nyùy, shilív shém shí tùúy ne e wò wùn. Shí kù tùúy ne a dzə̀ e wò wùn. M yíi a yòv, a burí wò. Mo‑óò yimen, a yòv,

²a yìmrì lúŋ, à yé nshìí. Mo‑óò yov, e yìmrì shúy, é ndzə rán.

³Rúrú, NYÙY TÀR, m yíi a beèrì wò e wírí mvəm. M yíi a yòv, a burí wò e vitúm ví mvəm.

⁴Koŋ yé ye à koŋ wír vée kùʼ feyì. Yí kùʼ feyì, a bó mfìʼ yòʼ dzə̀, aà kù yii tíy vèn áwune, e dù, e jòʼsì.

⁵Éè Nyùy, dìn vitaáví vé vi é ntoò yùv. Rúnér kitú ke nsay ki kidzə̀m e vikuʼùy vé vi.

⁶Sə́ mo e vitaáví vé ve ghaʼán ví. Yú tóŋ yémé, e bòyìr wír ve dzəə̀n vée.

⁷Nyùy sùŋnín ne fo wun kirə̀ʼ ke ranén kí jii, «Mo m tavin ne, e ghàʼ, m yíi jàv ŋkàlaʼ yee Shekem, e toʼtí Kiwoóy ké Sukkot, e jàv e wír vémé.

⁸Kér mo nsay Gilead, a rám Manassèe dzə̀ yém. Yé Efrayime wáa dzə tán yém kishàa, a yé Judàa dzə̀ kitoómé kém.

⁹Kitúm kee Moav ki kù dzə̀ kfə́ ji mbǐʼ mendzə̀v, mbìʼ wo m su wúu yém shó, woŋ Edome wáa dzə fo m yíi shwèy alábáʼ vém. Kù‑uù tòn mo fó, a m yíi a yòv nsiì e wír veé Filistiàá kitu.»

¹⁰Éè mǒ vèné, yíi dànèr la mo, é bo á du, e tòn Edom? Yíi lì la mo, é bo á nəə́ é ŋkàlaʼ ye á gìŋèn e kayi?

¹¹Éè Nyùy, à bìn ne rú ndzə̀m e vèr a? À yòʼ dzəə́ du fo mbìy, danèr vé rər vér a?

¹²Ku sə̀ ver fo aŋgaà vér vibàné. Sə́ ye yí lo fo wírií dzə̀ kifá kisáŋ.

¹³A Nyùy lò, e tòm ver, bo vèr yíi so rə́r. Kù yíi koʼrí wun aàŋgaà vér vibàné kitu.