Read Lamnso Nsùyrì Nyùy 109 Bible Online

Nsùyrì Nyùy 109 - Lamnso bible

Nsùyrì Nyùy 109

¹[129] Éè Nyùy, wò wo m búri, lá à yòʼ gòʼ. Yú tóŋ yémé.

²Wír ve á méŋ wò wùn à vé kimboʼtìi gìm ne mo, bóʼti vinyo e mǒ bàm.

³Á sùm ne mo e vibàn ví, guutì mo, a m dzə̀ là njò.

⁴M koŋ áwune, bunrì fo áwune, aá kù tóy vinyo tóyín e mǒ bàm.

⁵Á siir vinyo vém ve juŋ vi a dzə̀ e ve bi ví. M koŋ áwune, aá kù ban mo bánen.

⁶Ku shòʼ mfáŋgúm wìr wúmóʼó, é wú shém e ŋgaà wom vibǎn bàm. Wìr ku tìír wun e kibàʼ ke nsaʼ, e naàrì ajay və́.

⁷Á sáʼ nsaʼ rə, é yì ku koò wun. Á ku lì bunrì rə́, e gòv wun sho góvin.

⁸Dzəʼə̀m rəə́ ku tàv tsə̀mér, é wìr wo sən yov kéŋ rə́.

⁹Wón vəə́ ku kfə̀n ji alàtàr, é wiíy kfə́n ji wiiy ŋkfə.

¹⁰Wón vəə́ kú a jan janén, a lon viloòné. Á ku jùm áwune fó viŋkfə̀ʼ ve lav ve á dzə́ sho vìn.

¹¹Wìr wo wù kaá wun ku koò kifá kfə́ kidzə̀m ke wù kérí. Viŋgwìy vi ku faàsì kéŋ rə́ e dzə̀m.

¹²Lá wìr yòʼ kfə̀n a sham wun, kìn ji wìr rə́r mendzən me won və́ ji wón tsə̀.

¹³Á ku ndzəə̀r rám rə́ ndzə́ərin, é yír rəə́ ku lày fo ŋgwàʼ ye yì wíy a kuy.

¹⁴NYÙY TÀR kú a kuumé vinyo ve bi ve atǎr ŋgaà wom vibàné‑eè yiìn. Lá wun woo NYÙY TÀR yòʼ sù vinyo ve bi ve yè wov‑iì yiìn.

¹⁵NYÙY TÀR kú a kuumé ajay atàr və́ ghán sidzə̀m, aá ku sə̀ʼsí yír ŋgaàŋ fo wòŋ, é kinyo kfə́ kí lay láyin ŋkuuŋkùŋ.

¹⁶Bó wù yòʼ‑oò ló a sham wír gheéy. Wù kù‑uù cí a dzə̀ kwán aàŋgàa kitàn wùn aàghéʼnceyí bàm, ron wuú wìr ve melív mè‑eè weèyìn ne, e meé mo vé‑eè kpukin.

¹⁷Mo wù kù‑uù koŋ fó a tin kàʼ ji lòné shóv á wír, wú ku shòv a dzə̀ wun. Mo wù‑uù tén fó a səə̀vì wíri, bòŋ é wù búŋ sá kisəəvì.

¹⁸Fóo tin kàʼ ji lòné shóv wír, yì‑iì dzə̀ nóliì və, wú ku bìnkìr e wun kitu, e nəə̀nín moo meŋgvə́r e wun vighvər.

¹⁹Lòn vəə́ kú a dzə moo ndzə̀y se wìr ndzəmen é wùn, a dzə moo kikuúví ke wìr kúr vishiíy vidzə̀m.

²⁰Á vilaámé ve NYÙY TÀR ku fò áàŋgàa gòv vémé. Kú a dzə vilaámé vé wìr dzə̀m wo wù shuʼ vinyo ve kisaŋ vi e mǒ bàm.

²¹Yii bèy, fo kém kí NYÙY TÀR, Nyùy wom, ku sə̀ mo, mo wò‑oò kàʼàn. Ku bòyìr mo, bìʼ fo à dzəə̀n e juŋ, aà kù koŋ wír vé.

²²M dzə̀ ŋgaà kitàn, e kfə̀n a dzə ghéʼncey. M yú nyár, a yí nəə̀nín ne e mǒ shilív é ŋàáŋàŋ.

²³M sí dunìn dùnìn moo kindzə̀ə́ndzəm keé ntoŋrìshùy. M koó e karìn mo á kàr ŋguùmé.

²⁴M lèm ne jíŋ, vitú ve ndzəə vi wáa shwaʼsín mo shwáʼsín. M yùm ne moo shiŋkúnŋkun.

²⁵M sì kifá ke vém vé vibàné jaʼà. Á yén mo, á wàa shèŋ a dzə̀ kitú.

²⁶Éè NYÙY TÀR, Nyùy wom, sə́ mo. Bòyìr mo, kù mo koŋ yée dzəə̀n.

²⁷Yìi, aáwune kiíy ji sə́ rú á wò mo. Éè NYÙY TÀR, ku yiì, aá kiíy ji yiì a wò.

²⁸Áwune lóo shov mo e lòné, à kù a səə̀vì mo sə́əvin. Shoór wír ve á guutì moó, e shèʼér mo woo ŋgaà wò lìm.

²⁹Ku sùm aŋgaà vém vibàné e nsòvkìtu. Woómé sév sí ku ndzə̀m áwune mo wìr ndzə̀m ndzə̀y.

³⁰M yíi a beèrì NYÙY TÀR féyì, a burí wun e màŋgòŋ mvəm,

³¹bìʼ fo wù kù yii tóm ghéʼncey, boyìr ŋgaàŋ fo wír ve á taʼ e laàr wune.