Read Lamnso Nsùyrì Nyùy 110 Bible Online

Nsùyrì Nyùy 110 - Lamnso bible

Nsùyrì Nyùy 110

¹[130] NYÙY TÀR‑iì sùúy e tàr wor jii, «Dzə̀ʼə̀m e mǒ koy yìyí, e meé e ghan se m wíy neèr aŋgaà vé vibàn e wò si, áà tiír wuú yé sho.»

²NYÙY TÀR wíy yiì, é sáʼ yée líysín bìíy se Sion, áà wáa saʼ aàŋgaà vé vibàné mvəm e vitaáví vé vi.

³À wíy fəə rə́r é kishiíy fó, é wír vée wiy, a fo vitú vév. Awàʼ vée wíy wìy, e tom wò, a kaarí aàgwan ve dzəə̀n vé Nyùy[131] moo ŋweʼ ye yí gbu kijàvndzə.

⁴NYÙY TÀR yì ne kilìʼ, a wù yòʼ wíy kuvsín kwaʼtì rə́. À kù wíy a dzə taà cù, e dù, e jòʼsì, a dzə moo taà cù woo *Melkisedek.

⁵NYÙY TÀR kù dzə̀ e wò koy yìyí. Dòʼshwiíy wíy kiv wun e kishiíy fó, é wù ton afon.

⁶Wù wíy saʼ vitúm, e màʼ ŋgeʼ aáwuné vitu. Wù wíy yuyrí wír vév nyanyày e shùu rər, e tòn afon virə́ʼ vidzə̀m e kitu ke nsay.

⁷Ké fòn və kí dzə̀, a wù wíy no ndzə́v yeé ghaa dzəə, nó, é wù rəsin, a tiy kitávín.