Read Lamnso Nsùyrì Nyùy 111 Bible Online

Nsùyrì Nyùy 111 - Lamnso bible

Nsùyrì Nyùy 111

¹Á wáa burí NYÙY TÀR. M yíi a beèrì NYÙY TÀR shilív shém shidzə̀m, a beèrì wun e wír vəə́ mvəm, a beèrì e mvə̀m kintatì ke wìr ve á yii réŋ.

²Lim se NYÙY TÀR lìmèn sí dzə̀ siwiíwíy, a wír ve á leey, koŋèe kù gwarìr mo sí gháné.

³Lim sə́ sí din vitaáví və́ wùn à vikuʼùy və́ ví, a yii rə́ ye réŋé kù tíy fo, e dù, e jòʼsì.

⁴Wù yiì ne, á kú a kuumé lim sə́ se wiiwíy sí. Wù koŋ wíri, kfə̀n shám áwune.

⁵Wù fó viyíkìr e wír ve á ghvə́m wune, a wù kuúme *mensaŋ mvə, e dù, e jòʼsì.

⁶Wù dùŋrì ne vitaáví və́ e wír vəə́. Wù‑uù faàsì nsay fo vitúm vi, e fò e wír vəə́ ji vitsə́ʼ vév.

⁷Vinyo ve wù yii vidzə̀m vi kù dzə̀ ve ru ví, là kiloʼ, a ntò sə́ sé yeʼéy si dzə̀ see jwáʼ.

⁸Sí kù tíy fo, e dù, e jòʼsì, a dzə̀ á kù a yiì réŋréŋ mo sí dzəə̀n, là kiloʼ.

⁹NYÙY TÀR‑iì tìn wír və́ fó vikwàn, e tùúy mensaŋ mvə, mè wáa tiy fo, e dù, e jòʼsì. Wù dzə̀ e ránén, e kfə̀n a dzə e beémén.

¹⁰Wìr lóo ghvəm NYÙY TÀR, bo wù kèʼ ne, a ker vifií. Lóo yu nsər sə́, bo wù sí kiiy mó a yiì vinyo. Búrí rəə́ kù wíy a tiy fo, e dù, e jòʼsì.