Read Lamnso Nsùyrì Nyùy 112 Bible Online

Nsùyrì Nyùy 112 - Lamnso bible

Nsùyrì Nyùy 112

¹Á wáa burí NYÙY TÀR. Bòŋ ké wìr wo wù ghvə́m NYÙY TÀR, tiir vifií é ŋàŋ a dzə̀ e wun nsər.

²Wón vəə́ wíy a ker vitaáví é wòŋ. NYÙY TÀR wíy səə̀vì rám wìr ve á yii réŋ.

³Bùʼ wùn à vikuʼùy ví dzə̀ e ŋgaàŋ lav, aá kù wíy a fèr liì və wo juŋ, e dù, e mày.

⁴Fə̀m lóo dzə e ndzə ye sənér, wír vee réŋé kù a yen rán. Yí kù kaʼày wir dzə̀m wo wù koŋ wíri, shám áwune, yii vinyo là kiloʼ.

⁵Bòŋ ké wìr wo wù kér wó tèéter, foor wíri mbàm. Wír, wo wù yii vinyo və́ là kiloʼ.

⁶Kinyo ki yòʼ wíy sə̀ʼ wír wo wù yúnin Nyùy. Wíri kù wíy a kuumé wun, e dù, e jòʼsì.

⁷Wù yòʼ yii fan fóo yu sáʼka wo bi. Shilív sə́ shí tíy kitávín, a wù yéʼti a dzə̀ e NYÙY TǍR wùn.

⁸Shilív sə́ shí tùúy ne, wù yòʼ fan kifá. Wù leey a dzə̀ fó mbìy ji Nyùy wíy màʼ a aŋgaà və́ vibàn.

⁹Wù kér wó rə́ tèéter fo vé kitàne ghán sidzə̀m, aá kù wíy a fèr liì və wo juŋ, e dù, e mày. Á wíy bùʼ wun e vitaáví ví wùn à viwìr vi.

¹⁰Wír ve á méŋ Nyùyi yéné, wúné wàa kìn áwune. Á kù wíy a ŋeytí sóŋ, a kpukír kpukín. Vinyo ve áwune yii, tiir vifií shó vi kù wíy a bvəərí bvəərín.