Read Lamnso Nsùyrì Nyùy 115 Bible Online

Nsùyrì Nyùy 115 - Lamnso bible

Nsùyrì Nyùy 115

¹Éè NYÙY TÀR, ku yiì, aá wáa koʼór yír yé, e làa yòʼ a burí a dzə̀ ver. Á kú a burí a dzə̀ wò, bìʼ fo à koŋ wír vé, e dù, e mày, tíy vèn áwune, e dù, e jòʼsì.

²Lá à yòʼ màʼtì ji vitúm vi wáa jàʼ ver, a dzər e vèr ji Nyùy wor sà bèé á.

³Nyùy wor kù dzə̀ é yuv, a wù yii yii kinyo a dzə̀ mo koŋ wun.

⁴Anyùy véví dzə̀ kév kifá, a fèr wír. Wìr lo, wù fèr e *kisha ke mbàm ke baar kí, lo yímóʼó, wù fèr e ke fəvír kí.

⁵Á kér shuu, a bó yòʼ dzə̀ á sùŋnín, kér sí, a bó á yòʼ yén virə́ʼ.

⁶Áwune kér vituʼùr, a bó yòʼ dzə̀ á yù kinyo, kér yúy, a bó yòʼ dzə̀ á rə̀msì kifá.

⁷Á kér wó, a bó yòʼ dzə̀ á mùmrì kifá sho, kér wuú, a bó yòʼ dzə̀ á ghàn. Jòkìnyàʼ, a bó yòʼ dzə̀ jì fəə̀ fo áwuné shuù.

⁸Wír ve á fer mebvə̀me kù yíi kfən, a dzə moo mebvə̀m mee shooy, a wìr dzə̀m wo wù tiir vifií shó kù yíi kfən, a dzə bèy.

⁹Éè wìr veé Isray, vèn tiír vifií ví e NYÙY TǍR wùn. Dzə̀ wun wo wù sə́ ven, kfə̀n kiŋsìnè.

¹⁰Éè wír vee kfə́ə Aaron, vèn tiír vifií ví e NYÙY TǍR wùn. Dzə̀ wun wo wù sə́ ven, kfə̀n kiŋsìnè.

¹¹Ven ve á ghvə́m NYÙY TÀR, vèn tiír vifií ví e wun wùn. Dzə̀ wun wo wù sə́ ven, kfə̀n kiŋsìnè.

¹²NYÙY TÀR kù yii kuúme vèsən, a wù wíy səə̀vì vèsən. Wù wíy səə̀vì wír veé Isray, e səə̀vì kfə́ə Aaron vee atàá cù və́.

¹³NYÙY TÀR wíy səə̀vì wír ve á ghvə́m wun adzə̀m. Wù wíy səə̀vì ve terií, e səə̀vì ve kuʼkìné.

¹⁴NYÙY TÀR ku dzə̀sì vikuʼùy vén. Wúnwun ku dzə̀sì vé won vén.

¹⁵NYÙY TÀR ku səə̀vì ven, wun woo ŋgaà mbóm yùv wùn à nsay.

¹⁶Yúví dzə̀ wó NYÙY TÀR, a wù fò ne kitú ke nsay e wìr msòŋ.

¹⁷Aŋkfəsàyi yòʼ yii búri NYÙY TÀR. Wír ve á sí du aàŋkfəə́ wòŋe yòʼ dzə̀ á bùrí wun.

¹⁸Á bèy, vèr ku nèn a burí NYÙY TÀR, a burí wun, e kèʼ fo lèn, e dù, e jòʼsì. Á wáa burí NYÙY TÀR.