Read Lamnso Nsùyrì Nyùy 116 Bible Online

Nsùyrì Nyùy 116 - Lamnso bible

Nsùyrì Nyùy 116

¹M koŋ NYÙY TÀR, bìʼ fo wù yuun jí yem, e yù tóŋ yém.

²Mo wù fó vituʼùr və́ e mò, bo m kù yíi a toŋ, a beè a dzə̀ wun, a toŋ mo m wíy shiíy, e dù, e jòʼsì.

³Alíŋ kpuu‑uù gìŋ mo, e tàr, ghàʼkpu wáa kiv mo, m wáa yen ŋgeʼ, a kom aghàghir.

⁴M nèn tòŋ e NYÙY TÀR jii, «Éè NYÙY TÀR, m lón wò ji à ku lùŋèr mo.»

⁵NYÙY TÀR dzə̀ ŋgaà shammèndzə̀n, kér wíri kijuŋ, rə́r mendzən mev.

⁶NYÙY TÀR kiŋsìn wír ve bó yòʼ dzə̀ á sə̀ vitú vév. Kileémé kí‑iì sìʼìr mo, wù teér.

⁷Éè shilìv shem, rə̀sìne, bìʼ fo NYÙY TÀR géʼsin e wò, e ŋàŋ.

⁸NYÙY TÀR bòyìr ne mo fó kpu, e sòr mensíy fo mǒ si, e kìŋsìn mo fo m bayrin, e gbù.

⁹M nén a ghan a dzə̀ e Nyùy mbòv, kù bey, e kitu ke nsay fo wíri dzə́.

¹⁰M kù‑uù wáy shilív a dzə̀ e Nyùy wùn, e bó a suŋnín, a toŋ ji ŋgeʼ si ghàʼ á ne.

¹¹M túʼtín, a ghay wún jii, «Aà tiir vifií e wìr wùn, bo kù dzə̀ kisáŋ.»

¹²A dzə̀ m fò ka e NYÙY TÀR, bìʼ ambùʼmé ve wù bùʼùn mo shó?

¹³M kù yíi a màʼ meluʼ me nsiì, a beèrì NYÙY TÀR shó.

¹⁴M yíi tiím e wír vəə́ si adzə̀m, e runér ŋkàʼmé wo mò‑oò kàʼàn wun sho.

¹⁵NYÙY TÀR yòʼ yii li kpú wìr və́ fó tèr.

¹⁶Éè NYÙY TÀR, m dzə̀ ŋgaà wò lìm, a m dzə̀ kwàn wó, réŋréŋ mo yè wor‑iì dzəə̀n, à bòyìr ne mo fó kpu.

¹⁷M yíi seerí nyám si, a beèrì NYÙY TÀR shó. M yíi tiím, a bùnrì wun woo NYÙY TÀR.

¹⁸M yíi tiím e wír vəə́ si adzə̀m, e runér ŋkàʼmé wo mò‑oò kàʼàn wun sho.

¹⁹Rúrú, wír veé Jerusalem, m kù wíy tiím e věn si, e runér ŋkàʼmé wom e NYÙY TǍR taakìbùʼ. Á wáa burí NYÙY TÀR.