Read Lamnso Nsùyrì Nyùy 118 Bible Online

Nsùyrì Nyùy 118 - Lamnso bible

Nsùyrì Nyùy 118

¹Á kú a beèrì NYÙY TÀR, bìʼ fo wù dzəə̀n e juŋ. Koŋ ye wù koŋ wír vəə́ yòʼ wíy mày.

²Wír veé Israyi kú a suúy jii, «Koŋ ye wù koŋ wír vəə́ yòʼ wíy mày.»

³Kfə́ə Aarone kú a suúy jii, «Koŋ ye wù koŋ wír vəə́ yòʼ wíy mày.»

⁴Wír ve á ghvə́m NYÙY TÀRí kú a suúy jii, «Koŋ ye wù koŋ wír vəə́ yòʼ wíy mày.»

⁵Mò‑oò bì NYÙY TÀR e mǒ mvə̀m ŋgeʼ, wù yú tóŋ yém, e bòyìr mo.

⁶NYÙY TÀR dzə̀ e mǒ ghaŋ, m yòʼ kfə̀n fan kifá. A dzə̀ wìr kfə̀n yiì ka e mò?

⁷NYÙY TÀR dzə́ e mǒ ghaŋ, sə́ mo, a m wíy yòv nsiì aàŋgaà vém vibàné kitu.

⁸Kí bòŋ, e lìr a dzə̀ e NYÙY TǍR wùn, e shaà fó tiír vifií a dzə̀ e wìr msǒŋ wùn.

⁹Kí bòŋ, e lìr a dzə̀ e NYÙY TǍR wùn, e shaà fó tiír vifií a dzə̀ e vé saʼá wùn.

¹⁰Aŋgaà vém vibàné‑eè gìŋ mo, e tàr, m laàr áwune adzə̀m e NYÙY TǍR yir.

¹¹Áwune‑eè kàáy mo mbìv sidzə̀m, m laàr wir dzə̀m e NYÙY TǍR yir.

¹²Áwune‑eè bòm e mǒ wùn moo yúu, baári e njà wùy se á dzəy və́y shó, m laàr wir dzə̀m e NYÙY TǍR yir.

¹³Vé‑eè nyoòrì mo, e bǒy koo, yii bèy, NYÙY TÀR sə́ mo.

¹⁴NYÙY TÀR dzə̀ vitaáví vém, a dzə̀ yòv wom, wù lò ne, e lùŋèr mo.

¹⁵Yú mo á yov nsiì e wír Nyùyí kibeèy, shéʼri. Á rəə́me jii, «NYÙY TÀR sò ne e kóy və́ wo tavíné.

¹⁶NYÙY TÀR nàn ne kóy və́ wo tavín é yuv. Wun woo NYÙY TÀR sò ne.»

¹⁷M yòʼ yíi kpu. M yíi a dzə sho e tin, a fìʼtì vinyo ve NYÙY TÀR yiìn.

¹⁸NYÙY TÀR màʼ ne ŋgeʼ ye wiy e mò, yii bèy, e làa yòʼ fo mo e kpúu.

¹⁹Vèn mvəʼ shúu kibùʼu, e fò e mò, shúu kibùʼ fo wír Nyùyi shaa, é m bóo fíʼ nəə́, e beèrì NYÙY TÀR.

²⁰Kibuʼ kìn ki dzə̀ ké NYÙY TÀR, wír ve á yúnin wune wíy nəə́ a dzə̀ fó fo.

²¹NYÙY TÀR, m beerì wò wo à yuun tóŋ yém. NYÙY TÀR, à lò ne, e lùŋèr mo.

²²Tíy ye vé kimbome leeyin ntéŋé, sì yíwun ye yí loòn ne, e tòm kór lav.

²³Kù yiì NYÙY TÀR kinyo kìn, vèsən wáa leéy, a ker gháʼ.

²⁴Kin ki dzə̀ kishiíy ké nsiì ke NYÙY TÀR, vèsən wáa sàvnìn, a sheʼrí kishiíy kin.

²⁵Éè NYÙY TÀR, vèr yom wò, ku lùŋèr ver. Éè NYÙY TÀR, vèr yom wò, ku yiì, é kinyo ke vèr taŋen kí ghán.

²⁶NYÙY TÀR ku səə̀vì wír wo wù wiy e wun yir. Vèr səəvì ven fo NYÙY TǍR lav.

²⁷NYÙY TÀR dzə̀ Nyùy. Wù fò ne vèsən rán. Vèsən wáa kèʼ ŋkàʼ vən, a ker tám se vici é wo, a ghan sho, a kaarí kíy cù.

²⁸À dzə̀ Nyùy wo m ghvə́mé, a m yíi a beèrì wò. À dzə̀ Nyùy wom, a m yíi a koʼór yír yé.

²⁹Á kú a beèrì NYÙY TÀR, bìʼ fo wù dzəə̀n e juŋ. Koŋ ye wù koŋ wír vəə́ yòʼ wíy mày.