Read Lamnso Nsùyrì Nyùy 119 Bible Online

Nsùyrì Nyùy 119 - Lamnso bible

Nsùyrì Nyùy 119

¹Bòŋ ké wìr ve á dzəə̀n là nsem, jumrì kinyo ke Ŋwàʼ Nsər NYÙY TÀR.

²Bòŋ ké wìr ve á yúnin vinyo ve Nyùy foon, diy shilív shidzə̀m ji á yii á mo ví dzəə̀n.

³Dzə̀ áwune ve á yòʼ yii vinyo ve bi ví, aá ghán kév a dzə̀ e Nyùy mbòv.

⁴NYÙY TÀR, à fò ne ver ntò sé se yeʼéy, ji á wáa ŋeèvì, a yunín sidzə̀m.

⁵M diy feyì ji m wáa ghan a dzə̀ e wò mbòv, a yunín sáʼ yé ghán sidzə̀m.

⁶M lóo tuy sí e wò nsər, lóo ŋeèvì sidzə̀m, bo bó yòʼ dzə̀ féyì m wìy shòór kitú, a woomé.

⁷M lóo yeʼéy vinyo ve à tinen là kiloʼ, e wày ji nsər, é m wáa ndzəʼ wò, vèr à shilív she ranén shí.

⁸NYÙY TÀR, m kù‑úù yúnín sáʼ yé, lá à yòʼ làysìn mo ŋkuuŋkùŋ.

⁹A dzə̀ wìr wàʼbìn ghàn é le, e bó a ker liì woo là nsem? A dzə̀ wù kù a yunín jí yè.

¹⁰M diy ji m wáa yunín wò shilív shém shidzə̀m, kú a shìy mo fo m jáy dzə́ə, e bìvír nsər sé.

¹¹M mèrìr ne jí sé, sí wáa lùm e mǒ shiliv, a kìm mo fo m jáy kinyo wòsò.

¹²Buríi wáa dzə fo wò NYÙY TÀR, kú a yeʼéy mo sáʼ yé.

¹³Vinyo ve à tinen fo wò shuù, e wày ji nsər, m kù yoŋ, rúvti vidzə̀m.

¹⁴M jumrì vinyo ve à foon, yú vijuŋ, kù mo wìr wo wù kér káv e ŋàŋ yii yú.

¹⁵M yíi a yòŋ, a kwàʼtì e wò ntò se yeʼéy, e way vifií ji m wáa ghan e wò mbòv.

¹⁶M yíi a sheʼrí sáʼ yé, e làa yòʼ a làysìn jí yè.

¹⁷Kú a geʼ e mò woo ŋgaà lìm wò, é m fíʼ a dzə e tin, a yiì mo jì yè suuyì.

¹⁸Mvə̀ʼ vifií vém ví, é m fiʼ kìíy viŋgaʼnìn ve vinyò ve ví fəə́ fo wò Ŋwàʼ Nsər.

¹⁹M kù bee beèn é nsay fèn, lá à yòʼ lìtì nsàv nsər sé fo mò.

²⁰Shilív shí kù baári mo ghán sidzə̀m ji m kiíy nsàv vinyò ve à tinen, e fíʼ a lèm.

²¹À yii wám wír ve á taʼ wò ntéŋ, shóv áwune ve á maʼày nsər sé.

²²Ku tèʼtín mo fo áwuné liy si, à fo áwuné ŋkáymé, bìʼ fo m yii yúnin vinyo ve à foon.

²³Mo vé saʼa fə̀m kár menàŋ e mǒ bàm, bo mo woo ŋgaà lìm wò yíi a yòŋ, a remrí sáʼ yé.

²⁴Vinyo ve à foon ví dzə̀ vijuŋ vém, kù dzə̀ víwun ve ví tír mo.

²⁵M sì é mentsə̀m me kpu, siìr mo é bàm, kù mo wò‑oò kàʼàn.

²⁶Mò‑oò naàrì liì wom e dzə̀m e wò, à yuúrí, e bìnèr mo. Kú a yeʼéy mo sáʼ yé.

²⁷Yìi, é m kiíy kinyè ké ntò sé se yeʼéy, kiiyì, é m yiì a lèm viŋgaʼnìn vé ve vinyò e vifii, a kwàʼtì sho ghán sidzə̀m.

²⁸M kù sí dzə́ mendzən mendzən, távír mo réŋréŋ mo wò‑oò kàʼàn.

²⁹Kiír kimboʼtì ki fo mǒ shuù, e shàm mo, a yeʼéy mo Nsər yè.

³⁰M shòʼ ne ji m yíi a tiy e wò wùn shilív shimòʼón, a tiír a dzə̀ vinyo ve tinen wò fo mbìy.

³¹M lùm ne vinyo ve à foon, e kpù shó. Éè NYÙY TÀR, lá à yòʼ màʼày mo, é m wáa woomé.

³²M kù yíi a jùmrì, a yeʼéy nsər sé, bìʼ fo à yíi a dzə̀sì vifií vém.

³³Éè mǒ NYÙY TÀR, yéʼéy mo sáʼ yé, é m yiì a yunín, e dù, e jòʼsì.

³⁴Fó mo vifií, é m bóo fíʼ a jùmrì Nsər yè, a yiì mo yì dzəə̀n, shilív shidzə̀m.

³⁵Ku dànèr mo, é m wáa ghan mo nsər sé si dinè. Á kinyo ke kí fó mo vijuŋ.

³⁶Yìi, é shilív shém shí wáa lùm e vinyò ve à foon, é la m yòʼ a jùm a dzə̀ káv woó nsay.

³⁷Teér sí yémé fó vinyò ve kisaŋ vi. Kìm dzəʼə̀m yémé, é m fíʼ a dzə sho, a ghan e wò mbòv.

³⁸Yiì kinyo ke wò‑oò kàʼàn ŋgaà lìm wò sho ki, ŋkàʼmé wo wù dzəə̀n fo wìr dzə̀m wo wù ghvə́m wò.

³⁹M fan liy se aŋgaà vém vibàné shur mo shó sìn. Ku sə̀ mo, bìʼ fo vinyo ve tínen wò vi kù yii dzə́ vijuŋ.

⁴⁰Yén ri mo m yár jiŋ ntò sé se yeʼéy. Mo à yii yii vinyo vé là kiloʼ, ku fìyír dzəʼə̀m yémé.

⁴¹Éè NYÙY TÀR, ku dìn koŋ ye à kér fo wír vée e mò. Ku lùŋèr mo mo wò‑oò kàʼàn.

⁴²M luŋè, é m sə́tí shúu wìr ve á shur mo, bìʼ fo m kù yú kém a dzə̀ fo wò jì.

⁴³Tóm mo, é la kinyo ke dzəə̀n ke ru kí yòʼ lày fo mǒ shuù, bìʼ fo m kù leey a dzə̀ vinyo ve tínen wò, é ví wáa dànèr mo.

⁴⁴M yíi a yunín Nsər yè ghán sidzə̀m, a yiì mo yì dzəə̀n viyá viyá là may,

⁴⁵a ghan, a wàrkìr, bìʼ fo m yú a dzə̀ fó ntò sé se yeʼéy se à foon e mò.

⁴⁶Vinyo ve à dìnèn, m yíi a fìʼtì aàfone, a bó yòʼ dzə̀ kí kòóy ji m wáa woomé ji ví shaà ne a fo ghaŋ.

⁴⁷Vijuŋ vém ví dzə̀ ji m wáa yunín nsər sé, bìʼ fo sí gheenen mo é ŋàŋ.

⁴⁸M ghvə́m nsər sé, a shilív shém shí tíy sho. M kù yíi a yòŋ, a remrí sáʼ yé.

⁴⁹Kuúmé ŋkàʼmé wo à foon e mò woo ŋgaà lìm wò, e yiì, é m wáa leéy fó mbìy e kwaʼtì ye juŋe.

⁵⁰Kinyo ke kí rəər mo é mvə̀m ŋgeʼ se m yéné, kù dzə̀ ŋkàʼmé wò wo wù sheŋrì dzəʼə̀m yém.

⁵¹Wír ve á taʼ wò ntéŋé sí maʼ lám e mò, yii bèy, a bó yòʼ dzə̀ féyì m wàa bìn ndzə̀m e wò Nsər.

⁵²NYÙY TÀR, m kuúme mo à yii tínen nsaʼ e kèʼ fo yàŋgùʼ, shilív shí kù rə̀sìn mo.

⁵³M leey wír ve á méŋ wò, ŋwáy Nsər yè, dòʼshwiíy kù a kiv mo kívín.

⁵⁴Sáʼ yée sì e mǒ shuù e njà lùŋ, e wòŋ wo m dzəə̀n kiŋgwìy sho və̀n.

⁵⁵Rúrú, NYÙY TÀR, m kù kuúme wò, taaka vitsə́ʼə́, li Nsər yè e shií, kwaʼtì sho.

⁵⁶Vijuŋ vém ví kù dzə̀ ji m yúnín á ntò se yeʼéy se à foon.

⁵⁷NYÙY TÀR, à dzə̀ vitsə́ʼ vém, a m kàʼ ne ji m yíi a yunín a jí sé.

⁵⁸M búʼ wó, lón wò shilív shém shidzə̀m, ku shàm mo mo ŋkàʼmé wò dzəə̀n.

⁵⁹M lóo kuumé yii yém, m nèn bìnkìr, a jùmrì vinyo ve à foon.

⁶⁰M sí shwírí, a m yòʼ kfə̀n jívir ghán, fó a lèm nsər sé.

⁶¹Wír ve á méŋ wòo gìm ne mo, e tàr áàlíŋé. Yii bèy, a bó m yòʼ laysìn Nsər yè.

⁶²M lo, m lò é yuv e ntìntìn vitsə̀ʼ, a sùyrì wò, bìʼ vinyo ve à yii tínen là kiloʼ.

⁶³M dzə̀ ŋgaà ŋgoo wìr dzə̀m wo wù ghvə́m wò, ŋgaà ŋgoo wìr wo wù lem ntò sé se yeʼéy.

⁶⁴Koŋ ye à kér fo wír vée rùn kitú ke nsay kidzə̀m. Éè NYÙY TÀR, ku yèʼéy mo sáʼ yé.

⁶⁵Éè NYÙY TÀR, à dzə̀ aà géʼsin e wìr wò lìm kijuŋ, à géʼsin, kù mo wò‑oò kàʼàn.

⁶⁶Shilív shém shí kù tíy a dzə̀ é nsər se à foon, yéʼéy ri mo, é m wáa ker vifií, a tàr vinyo kijuŋ.

⁶⁷Wò‑oò màʼ ŋgeʼ e mò, bo m fiír. Mò‑oò tèn fó a yu wò, yii bèy, m sí yúnin jí yè lèn.

⁶⁸À dzə̀ e juŋ, a yii yée dzə̀ e juŋ, ku yèʼéy mo sáʼ yé.

⁶⁹Wír ve á taʼ wò ntéŋé lór vinyo e mǒ bàm, yii bèy, a m kù yúnin ntò sé se yeʼéy shilív shidzə̀m.

⁷⁰Áwune dzə̀ viyúŋ, a bó á yòʼ yú kinyo. Yii bèy, fo mò, Nsər yè ghèén mo féyì.

⁷¹Kí kù bòŋ mo wò‑oò màʼàn ŋgeʼ e mǒ kitu, ji m fiʼ yèʼéy sáʼ yé.

⁷²Yéʼéy ye yí fəə́ fo wò shùu bòŋ mo féyì. Yí shaà nyanyày *kisha ke mbàm ke baar wùn à ke fəvír kí kàŋ là táŋ.

⁷³Wò‑oò nàŋsín, e bòm mo e wó yée, ku mvə̀ʼ vifií vém ví, é m wáa yeʼéy nsər sé.

⁷⁴Wír ve á ghvə́m wòo wíy yen mo, a ker kishéʼrì, bìʼ fo m tiir a dzə̀ wò fo mbìy, yú fo wò jì.

⁷⁵NYÙY TÀR, m kì ji à yii tínen nsaʼ là kiloʼ, a wò‑oò lo màʼ ŋgeʼ e mǒ kitu, aà koŋ mo kóŋen.

⁷⁶Koŋ ye à kér fo wír vée kú a rəə̀r mo ghán sidzə̀m, kù mo wò‑oò kàʼàn mo woo ŋgaà lìm wò.

⁷⁷Shám mendzən mem mè, é m fíʼ a dzə sho, bìʼ fo Nsər ye à foon siìn vijuŋ vém.

⁷⁸Ku sèn vé kiŋkoʼòrwùné, aá wáa woomé, á tóy vinyo e mǒ bàm kisáŋ. Fo kém kí, m kù yíi a yòŋ, a remrí ntò sé se yeʼéy.

⁷⁹Ku yiì, é wír ve á ghvə́m wòo wiy, e yèn mo, wiyì, aá fiʼ kìíy vinyo ve à foon.

⁸⁰Yiì ji m kú a yu sáʼ yé shilív shidzə̀m, é la m yòʼ yiì shòór kitú, a woomé.

⁸¹M shìy ne wò ji à luŋer mo, e dòr, yii bèy, m kù tiir a dzə̀ wò fo mbìy, yú fo wò jì.

⁸²M shìy ne ŋkàʼme wò ntàmda, e dòr, a ghay ji à sà yíi rəə̀r mo é ghàn ka á?

⁸³M sì moo júv ye yì sə́ŋ e sikiy, yii bèy, a bó m yoʼ làysìn sáʼ yé.

⁸⁴Ŋgaà lìm wò yíi kur shilív, e dù, e meé e le? À wíy tinén nsaʼ wìr ve á ron wúu yém é ghàn ka?

⁸⁵Wír ve á taʼ wò ntéŋé tùŋ ne bií ji m gbu shó, áwune vin ve á yòʼ yúnin Nsər yè.

⁸⁶Nsər sé sidzə̀m si kù tíy fo, e dù, e jòʼsì. Áwune ron wúu yém e kimboʼtì ki, ku sə̀ mo.

⁸⁷Bèr shishàr bo áwune laàr dzəʼə̀m yém fó kitu ke nsay, yii bèy, bó m yoʼ bìn ndzə̀m e wò ntò se yeʼéy gheéy.

⁸⁸Ku bàvtí dzəʼə̀m yémé, bìʼ koŋ ye à kér fo wír vée é m fíʼ a dzə, a yunín vinyo ve ví fəə́ fo wò shuù.

⁸⁹NYÙY TÀR, jì yè kù tíy fo ghán sidzə̀m. Yì dzə̀ e fiìn é yuv.

⁹⁰Kinyo ke wò‑oò suuyin kí kù wíy a tiy fo, a tiy fo, fo ŋgwàʼ se sí kóʼ si sidzə̀m, aà tùúy ne kitú ke nsay, kí wáa tiy ji ŋkǐŋ.

⁹¹Vifá vidzə̀m vi dzə̀ shó e to lán, mo wò‑oò foon sáʼ, bìʼ fo ví kù yú a dzə̀ fo wò.

⁹²A dzə̀ ji m yòʼ‑oò ló a lì Nsər yè ji vijuŋ vém, bo ŋgeʼ se m yén sìn si‑iì lo yùyrí mo.

⁹³Bó m yòʼ wíy làysìn ntò sé se yeʼéy, bìʼ fo à shaàn a dzə̀ fó fo, e bóo yiì, é m luŋ.

⁹⁴M dzə̀ wir wò, ku sə̀ mo. M mùm ne feyì, a jùmrì ntò sé se yeʼéy.

⁹⁵Wír ve á méŋ wòo wooy ji á laar mo, yii bèy, a m kù tíy a dzə̀ é vinyò ve à foon.

⁹⁶M yèn ne ji kifá kidzə̀m ki kù kér kimaysì kfə́, kù jòʼsì nsər yè ye yì shoon là mfìʼ.

⁹⁷M koŋ Nsər yè feyì. M rə́si, m kwàʼtì shó kishiíy kifur.

⁹⁸Nsər yè yii, a m fiir, shaa aŋgaà vém vibàn, bìʼ fo yì kù dzəə̀n e mǒ shiliv ghán sidzə̀m.

⁹⁹M kìíy ne e ŋàŋ, e shaà aŋgàa yeʼéy vém adzə̀m, bìʼ fo m kù yoŋ vinyo ve à foon, kwaʼtì sho ghán sidzə̀m.

¹⁰⁰M kiiy vinyo, shaa ŋgày sé wìr, bìʼ fo m lem ntò sé se yeʼéy.

¹⁰¹Bó m yòʼ jumrì dzə́ə ye bi fə̀m e mòʼón, m kù lem a dzə̀ jí yè.

¹⁰²M kù jumrì vinyo ve à tinen, e wày ji nsər, a bó m yòʼ yáʼay kímóʼ kí, bìʼ fo kù duŋrì wò mo.

¹⁰³Jí sé si nyòm, e ghèén mo é le ben? Sí nyom e mǒ shuù, shaa vilu.

¹⁰⁴À kù shaà a dzə̀ fo wò ntò se yeʼéy, e bóo fo mo vifií. Bìʼ bey, m nén a bàn dzə́ə sé kimboʼtì si sidzə̀m.

¹⁰⁵Jì yè dzə̀ kikaʼày kém, a dzə̀ sá rán ye yí kaʼày dzə́ə yem.

¹⁰⁶M yiì ne kilìʼ, e fìnèr ji m kù yíi a jùmrì vinyo ve à tinen, e wày ji nsər, a ví dzə̀ là kiloʼ.

¹⁰⁷M dzə̀ é mvə̀m ŋgeʼ ye tavín. Éè NYÙY TÀR, ku lùŋèr mo, mo wò‑oò kàʼàn.

¹⁰⁸Éè NYÙY TÀR, ku səə̀sí fómo wom nsùyrì, a yeʼéy mo vinyo ve à tinen, e wày ji nsər.

¹⁰⁹Kpúu siʼìr mo ghán sidzə̀m, a bó yòʼ dzə̀ féyì m làysìn Nsər yè.

¹¹⁰Wír ve á méŋ wòo gìm ne mo áàlíŋé, yii bèy, bó m yoʼ bàr ŋgoo fo wò ntò se yeʼéy gheéy.

¹¹¹M lì ne vinyo ve à dìnèn ji vitsə́ʼ vém vee là may. Eè, dzə̀ víwun ve ví fó mo kishéʼrì e mǒ shiliv.

¹¹²M wày ne wáyín fo mǒ shiliv ji m kú a yiì mo sáʼ yée dzəə̀n, a yunín ghán sidzə̀m, e dù, e jòʼsì.

¹¹³M ban abìnbìnteʼnsə́m, yii bèy, a m koŋ a dzə̀ Nsər yè.

¹¹⁴À dzə̀ kirə́ʼ kém ké kilìr, e kfə̀n a dzə ŋkeè wom rə̀r. M yoy, tiir vifií a dzə̀ e wò jì.

¹¹⁵Ven ve á buʼtì vinyo, vèn kíŋrí fo mǒ si, é m bóo fíʼ a yunín nsər se Nyùy wom.

¹¹⁶Tóm mo, kù mo wò‑oò kàʼàn, é m bóo fíʼ a dzə e tin. Lá à yòʼ yiì, é m wáa woomé, a m tiír ne vifií e wò wùn.

¹¹⁷Sə́ mo, e bòyìr mo, é m shaa fó mbìy, a lì sáʼ yé e shií ghán sidzə̀m.

¹¹⁸À mèŋ ne wir dzə̀m wo wù bar ŋgoo fo wò saʼ, eè, soóné yév ye á ghán, soónée lày kisáŋ.

¹¹⁹À lì wir dzə̀m wo wù méŋ wò ji viŋgà ve á maʼay, bìʼ bey, m ku nèn a kòŋ vinyo ve à dìnèn.

¹²⁰Wúné yaʼ mo, bìʼ fan ye m fan wò. M leey vinyo ve à tinen, e wày ji nsər, wúné wàa beemé mo beemén.

¹²¹M yiì ne kinyo ke kí dzəə̀n réŋ, kfə̀n a dzə tìítiy, lá à yòʼ màʼtì mo aàŋgàa vibàn vémé wo.

¹²²Ku tìím ji ŋgaà sə, e kìŋsìn wir lìm wò wo juŋ. Lá à yòʼ màʼtì, é wír ve á méŋ wòo nyavri e mò.

¹²³M shìy ne wò ji à luŋer mo, e dòr. M shiy ji à yii á mo wò‑oò kàʼàn.

¹²⁴Ku dìn koŋ ye à kér fo wír vée e ŋgaà wò lìm, a yeʼéy mo nsər sé.

¹²⁵M dzə̀ ŋgaà lìm wò, ku fò mo vifií, é m fiʼ kìíy vinyo ve à dìnèn.

¹²⁶NYÙY TÀR, sì ghán se dzə̀ à shìʼír, wíri bìvír ne Nsər yè.

¹²⁷M dzə̀ kém, a m kòŋ nsər sé, e shaà kisha ke mbàm ke baar kí, a fə̀m dzə̀ ke á tònèn ne, e shèŋrì.

¹²⁸Bìʼ bey, m ku nèn a ghan mo ntò sé se yeʼéy sidzə̀m si dinè, a bàn dzə́ə sé kimboʼtì si sidzə̀m.

¹²⁹Vinyo ve à dìnèn ví bòŋ e shaà vitaáví, bìʼ bey, m nén a yiì mo ví dzəə̀n.

¹³⁰À sánri jí sé, a sí fó rán, wáy vifií áànjìʼí vitu.

¹³¹Shúu wiyrì mo, bìʼ fo m yár jiŋ Nsər yè.

¹³²Bìnkìr, e lèéy mo, e shàm mo, mo à yii yii e wír ve á koŋ yír yée.

¹³³Mo wò‑oò kàʼàn, kú a kìŋsìn mo fo m gbu. Ku yiì, é la kinyo ke bi kí yòʼ sò mo.

¹³⁴Fəə́r mo fo aŋgàa vibàné wo, é m bóo fíʼ a yunín ntò sé se yeʼéy.

¹³⁵Kú a dzə vèn ŋgaà lìm wò. Á yeʼéy mo sáʼ yé.

¹³⁶M sə́ʼər mensíy e ŋàŋ, bìʼ fo wíri ŋwáy Nsər yè.

¹³⁷Rúrú, NYÙY TÀR, à dzə̀ là jay, à tínen vinyo vé, a ví kù du tìítiy.

¹³⁸Vinyo ve à foon, e wày ji nsər vi dzə̀ là nsem, a ví kù tíy fo mo à kàʼàn.

¹³⁹Dòʼshwiíy kív mo, bìʼ fo aŋgaà vém vibàné laysìn jí sé.

¹⁴⁰Ŋkàʼme wò kù dzə̀ là kiloʼ ŋkuuŋkùŋ, a kwàn wóo koŋ ŋkàʼmé woo shooy feyì.

¹⁴¹M dzə̀ là ghay, aá taʼ mo ntéŋ, yii bèy, a bó m yòʼ laysìn ntò sé se yeʼéy.

¹⁴²À kù wíy a dzə là jay bèn, e dù, e jòʼsì, a Nsər yè kù wíy a tiy fo ji ŋkǐŋ.

¹⁴³Ŋgeʼ wùn à nyári sùm ne mo, yii bèy, a nsər sé si fó mo vijuŋ.

¹⁴⁴Vinyo ve à foon ví kù dzə̀ là nsem, e dù, e jòʼsì. Ku fò mo vifií, é m fíʼ a dzə e tin.

¹⁴⁵Éè NYÙY TÀR, m tóŋ e wò vèr à shilív shém shí. Ku sə̀ mo, é m wáa yunín sáʼ yé.

¹⁴⁶M tóŋ e wò, ku lùŋèr mo, é m yiì a yunín vinyo ve à foon.

¹⁴⁷Bo ndzə wáa jàv, a m nánén ne, a toŋ e wò. M tiir vifií a dzə̀ é jì se sí fəə́ fo wò shuù.

¹⁴⁸M shiiy, kiʼ kìʼìn vitsə́ʼ vifur, ji m fíʼ a yòŋ, a remrí ŋkàʼme wò.

¹⁴⁹Ku yù jí yem, bìʼ koŋ ye à koŋ wír vé. Éè NYÙY TÀR, à yii tínen kinyo ké tìítiy, ku dàrìr dzəʼə̀m yémé.

¹⁵⁰Wír ve á bá menàŋé sí méʼ mo fó mentsə̀m, a bó á yòʼ yén Nsər yè ji kifá.

¹⁵¹Yii bèy, NYÙY TÀR, à dzə̀ fó mentsə̀m, a nsər sé sidzə̀m si tíy fo ji ŋkǐŋ.

¹⁵²Wò‑oò tùúy vinyo ve à foon ji ví wíy shaàrì, a mò‑oò yòŋ ne, e kìíy bèy fo ŋgùʼ.

¹⁵³Ku lèéy ŋgeʼ ye m yéné, e fə̀ə́r mo fó fo, bìʼ fo m yòʼ laysìn Nsər yè.

¹⁵⁴Bìn kinyo kém kí, e tìn mo fó nsaʼ, e lùŋèr mo mo wò‑oò kàʼàn.

¹⁵⁵À yòʼ wíy lùŋèr wír ve á méŋ wò, bìʼ fo á yòʼ taʼ ntò sé se yeʼéy.

¹⁵⁶Éè NYÙY TÀR, shammèndzə̀n wò kùʼ e ŋàŋ, lùŋèr mo mo nsaʼ yè yee là kiloʼ dzəə̀n.

¹⁵⁷Wír aníne ron wúu yém, tsə́y kóy vèr áwune, yii bèy, a bó m yòʼ téŋen fo vinyò ve à dìnèn.

¹⁵⁸M leey wír ve á ŋwáy wò, vitó vi bìnkìr mo, bìʼ fo áwune maʼày kinyo ke suuyin wò.

¹⁵⁹NYÙY TÀR, ku yèn mo m koŋ ntò sé se yeʼéy, ku lèm dzəʼə̀m yémé, bìʼ koŋ ye à koŋ wír vé.

¹⁶⁰Kinyo ke à suuyin kidzə̀m ki dzə̀ suuyrú, a kinyo ke à tínen kimòʼón kimòʼón ki kù dzə̀ là kiloʼ, a kí wíy shaàrì.

¹⁶¹Vé saʼa ron wúu yém là njò, yii bèy, a dzə̀ shilív shí kù yàʼ mo, bìʼ jí yè cáʼ.

¹⁶²M shéʼri ŋkàʼme wò e ŋàŋ, moo wír wo wù toon é bùʼ e gháʼán.

¹⁶³M yii ban kimboʼtì, kfə̀n nyaysì, yii bèy, a m kù yii koŋ Nsər yè.

¹⁶⁴M yii suyrì wò e kishiíy kàŋ saàmbà, bìʼ vinyo ve à tínen là kiloʼ, wáy ji nsər.

¹⁶⁵Wìr dzə̀m wo wù koŋ Nsər yè kér nyaáŋ ŋkuuŋkùŋ, a bó kifá ki yòʼ dzə̀ shó, ke dzə̀ kí yiì, áwune bàyrìn.

¹⁶⁶NYÙY TÀR, m tiir vifií a dzə̀ e wò wùn ji à luŋer mo, a m yii mo nsər sé si suuyì.

¹⁶⁷M kù lem vinyo ve à foon, a m koŋ víwun e shaàsìn.

¹⁶⁸M yúnin ntò sé se yeʼéy, à vinyo ve à dìnèn ví vidzə̀m, bìʼ fo à yén yii yém e dzə̀m.

¹⁶⁹Éè NYÙY TÀR, ku yù tóŋ yémé, ku fò mo vifií, kù mo wò‑oò kàʼàn.

¹⁷⁰Ku yù bunrì yémé, e fə̀ə́r mo fó ŋgeʼ, kù mo wò‑oò kàʼàn.

¹⁷¹M kù yíi a burí wò, bìʼ fo à yéʼey mo sáʼ yé.

¹⁷²M yíi a yòv jí yè e njà lùŋ, bìʼ fo nsər sé sidzə̀m si dzəə̀n tìítiy.

¹⁷³Kú a dzə kibáʼtín, e sə̀ mo, bìʼ fo m shoʼon ne kém a dzə̀ ntò sé se yeʼéy.

¹⁷⁴Éè NYÙY TÀR, m yár jíŋ ji à luŋer mo, vijuŋ vém ví kù dzə̀ Nsər yè.

¹⁷⁵Dàrìr dzəʼə̀m yémé, é m fíʼ a burí wò, é vinyo ve à tinen, e wày ji nsər vi kú a sə mo.

¹⁷⁶M sí ján janén moo njiì wo wù làyìn ne, ku tàʼ ŋgaà wò lìm və̀n. M yòʼ laysìn nsər sé.