Read Lamnso Nsùyrì Nyùy 121 Bible Online

Nsùyrì Nyùy 121 - Lamnso bible

Nsùyrì Nyùy 121

¹[133] M nan sí, leey agwan, gháy jii, ŋgaà sə wom yíi lò a dzə̀ fó feé?

²Ŋgaà sə wom kù dzə̀ NYÙY TÀR, wun wo wù‑uù bomen yúv wùn à nsay.

³Bó yòʼ dzə̀ wù màʼtì, à tò é kinyò ke bi kí. Bó yòʼ dzə̀ wun wo wù kiŋsìn wò, wù wàa buuné buunén.

⁴Kù dzə̀ wun Ŋgaà wo wù kiŋsìn wír veé Isray. Yòʼ dzə̀ féyì wù wàa yèʼ, a bó yòʼ dzə̀ wù wàa buuné.

⁵NYÙY TÀR dzə̀ kikiŋ ké, a dzə̀ wun kikfə́vsì ké, a wù dzə̀ e wò ghaŋ.

⁶Bó shùy yòʼ yíi a tònrì wò, a bó ŋwee yòʼ yíi a yuy wò e kintòn ki.[134]

⁷NYÙY TÀR kù yíi a kìŋsìn wò fo kileemé. Wù yíi a bavtí dzəʼə̀m yé.

⁸NYÙY TÀR yíi a leéy fo wò, mo à yíi a fəə, a ghan, a kfən e bàm, e kèʼ fo lèn, e dù, e jòʼsì.