Read Lamnso Nsùyrì Nyùy 132 Bible Online

Nsùyrì Nyùy 132 - Lamnso bible

Nsùyrì Nyùy 132

¹[145] Éè NYÙY TÀR, lá à yòʼ làysìn Davir, à ŋgeʼ sidzə̀m se wù‑uù kurin shilív, a yen si.

²NYÙY TÀR, ku kuùmé kilìʼ ke Davir‑iì yiìn kí. Wù‑uù kàʼ wò woo Nyùy Jakov, wò woo Ŋgaà Vitaàví Vidzə̀m, e yòŋ jii,

³«Bó m yòʼ fə̀m yíi nəə́ e mǒ lav, e bóo jòkìnyàʼ, e neèm e mǒ kikun.

⁴M yòʼ yíi meèmè, kìn ji m maʼti, é mbuùné sí sum mo,

⁵a bó m náŋsín kirə́ʼ ke dzəə̀n ké NYÙY TÀR. Kirə́ʼ ke Nyùy Jakov wáa dzə sho, wun woo Ŋgaà Vitaàví Vidzə̀m.»

⁶Vèr‑iì yù léŋ ŋkùv mensàŋ NYÙY TÀR é Efrata, e nèn dù, e yèn é ŋgvən Jaar, a suúy jii,

⁷«Vèsən ku dù e NYÙY TǍR lav, e gvə̀ʼtí e wun si, a sùyrì wun.»

⁸Éè NYÙY TÀR, ku ŋàʼáy, e wìy e wò kirə̀ʼ ké meèmè, a wìy, vèn à ŋkùv mensàŋ wo wù din vitaáví vé.

⁹Atàá cù vée ku lì yii ye juŋe é wùn, mo wìr màʼ ndzə̀y, é wír vée wáa yòv bìʼ vijuŋ ve áwune yú.

¹⁰Éè NYÙY TÀR, wò‑oò yiì ŋkàʼmé vèn ŋgaà lìm wò woo Davir, lá à yòʼ bìnsìn wun woo fon wo wò‑oò yoʼon.

¹¹Wò‑oò yiì ŋkàʼmé vèn Davir, e sə̀ntì. Wò‑oò sə̀ntì féyì, a bó à yòʼ dzəə́ wìy kòr. Wò‑oò yii, suuy jii, «M yíi koʼór wán fo wò mvə̀m wòn ji fon, é wù yí ntaʼ wò.

¹²A wón vée ghàr *mensaŋ mem, a yunín ntò se yeʼéy se m wíy yeʼéy áwune shó, bo wón véví wíy yi sa ntaʼ wò, e dù, e jòʼsì.»

¹³NYÙY TÀR shòʼ ne Sion, e lèm fó ji kirə́ʼ kfə́ ké dzə, a suúy jii,

¹⁴«Sì kirə́ʼ kém ké meèmè, e dù, e jòʼsì. Dzə̀ fo m yíi a dzə, bìʼ fo m kér shií woo fó.

¹⁵M wíy səə̀vì Sion e nyanyày vifa ve yi, səəvì, é m yiír vé kitàn vee fó.

¹⁶M wíy lèm atàá cù və́ ji vé kimane, e lùŋèr wíri aáwuné wo, é wír vémé wáa yòv bìʼ vijuŋ ve áwune yú.

¹⁷M wíy yiì, é wìr woo Davir ram wùmòʼ fəə́ fó ji fon wo tavín, é sáʼ ŋgaà wo m yoʼoné wìy a dù fo mbìy, e dù, e jòʼsì.

¹⁸M wíy màʼ aŋgaà və́ vibàn, e shoór áwune, yii bèy, a vifon və́ ví kù wíy a kuy, a dù duùn fó mbìy.»