Read Lamnso Nsùyrì Nyùy 135 Bible Online

Nsùyrì Nyùy 135 - Lamnso bible

Nsùyrì Nyùy 135

¹Á wáa burí NYÙY TÀR. Ven vee aŋgàa lìm NYÙY TÀR, vèn wáa burí wun, a kwa wun.

²Ven ve á tíy e NYÙY TǍR lav, tíy e wun taakìbùʼ, vèn wáa burí wun.

³Vèn wáa burí NYÙY TÀR, bìʼ fo wù dzəə̀n e juŋ. Vèn wáa yòv, a wùʼsì yír rə́, bìʼ fo wù bòŋèn é ŋàŋ.

⁴NYÙY TÀR shòʼ ne rám Jakov ji wír və́, wír veé Israyi wáa dzə ji wír və́ vee jeéyí.

⁵M kì ji NYÙY TÀR dzə̀ e gháʼtín, a wù shaà anyùy adzə̀m, a fə̀m dzə̀ vəné.

⁶Wù yii yii kinyo ke wù kóŋ e yiì, a fə̀m dzə̀ é yuv, kìn é nsay, a fə̀m dzə̀ é rìbà ndzə̀v, kìn é loònsay.

⁷Dzə̀ wun wo wù lo, wù yiì, wuú wàa koʼkír, a wìy fo buu se ndzə, a kù yii wun, é bo kishèv ki wáa ŋwàŋ e ghan sé wuu. Kù fəər wun shwér fo wun kitàv.

⁸Dzə̀ wun wo wù‑uù yuyrin wón vee dzə́ə mbìyi veé Ejiv, à vé wìri, à vé nyàme.

⁹Wù‑uù yiì viŋgaʼnìn ve vinyò e Ejiv, e màʼ ŋgeʼ e Farao wùn aàtǎr ntoʼ vəə́ kitu.

¹⁰Dzə̀ wun wo wù‑uù yuyrin vitúm, e seèrí afon ve tavkíné.

¹¹Afon, moo Sihon woo fon wìr veé Amor, à Og woo fon woó Bashan, e lì afon adzə̀m ve vé‑eè sáʼ vitúm veé Kanan.

¹²Wù‑uù yùyrí, e nèn fò nsay yev e wír vəə́. Wù‑uù fò e wír veé Israyi ji vitsə́ʼ vév.

¹³Rúrú, NYÙY TÀR, à kù wíy a dzə ji Nyùy ghán sidzə̀m. Á kù wíy a yòŋ yír yé e ŋgwàʼ sí ŋgwàʼ si.

¹⁴NYÙY TÀR yíi bìn nsaʼ, e fo e wír vəə́. Wù yíi sham mendzən me aŋgàa lìm və́, e sə áwune.

¹⁵Anyùy ve vitum vi cúu dzə̀, a fèr wíri e wóo, aá fèr a dzə̀ e *kisha ke mbàm ke fəvír kí, kìn e ke baar kí.

¹⁶Anyùy vìne kér shuu, a bó yòʼ dzə̀ á sùŋnín, kér sí, a bó yòʼ dzə̀ á yèn kirə́ʼ.

¹⁷Á kér vituʼùr, a bó yòʼ dzə̀ á yù kinyo, a bó á yòʼ yoyì, e bó a ŋèʼ.

¹⁸Wír ve á fer anyùyi kù yíi kfən, a dzə moo áwune. Wìr dzə̀m wo wù tiir vifií shó kù yíi kfən sa, a dzə bèy.

¹⁹Ven vee wír veé Isray, vèn wáa burí NYÙY TÀR. Ven vee atàá cù, vèn wáa burí NYÙY TÀR.

²⁰Ven vee rám Levi, vèn wáa burí NYÙY TÀR. Ven ve á ghvə́m NYÙY TÀR adzə̀m, vèn wáa burí wun.

²¹Á wáa burí NYÙY TÀR é Sion, wun wo wù dzə́ e Jerusalem ji láʼ rə́. A wáa burí NYÙY TÀR.