Read Lamnso Nsùyrì Nyùy 136 Bible Online

Nsùyrì Nyùy 136 - Lamnso bible

Nsùyrì Nyùy 136

¹Vèn wáa fo vibeerì e NYÙY TÀR, wù dzə̀ e juŋ. Koŋ ye wù koŋ wír vəə́ yòʼ wíy mày.

²Vèn wáa fo vibeerì e NYÙY TÀR, wun wo wù shaàn anyùy adzə̀m. Koŋ ye wù koŋ wír vəə́ yòʼ wíy mày.

³Vèn wáa fo vibeerì e NYÙY TÀR, wun wo wù shaàn atàr adzə̀m. Koŋ ye wù koŋ wír vəə́ yòʼ wíy mày.

⁴Vèn wáa fo vibeerì e wun wo kù yii wun viŋgaʼnìn ve vinyò. Koŋ ye wù koŋ wír vəə́ yòʼ wíy mày.

⁵Vèn wáa fo vibeerì e wun wo wù‑uù kér vifií, e bòm yúv. Koŋ ye wù koŋ wír vəə́ yòʼ wíy mày.

⁶Vèn wáa fo vibeerì e wun wo wù‑uù bomen nsay, e sàŋrì e kitu ke ndzəv yeé loònsay.[148] Koŋ ye wù koŋ wír vəə́ yòʼ wíy mày.

⁷Vèn wáa fo vibeerì e wun wo wù‑uù fèrìn lúm se vikàʼày. Koŋ ye wù koŋ wír vəə́ yòʼ wíy mày.

⁸Wù‑uù fèr shúy ji yì wáa ban e shùy, koŋ ye wù koŋ wír vəə́ yòʼ wíy mày,

⁹e fèr ŋwee wùn à mejiy mè ji mè wáa ban vitsə́ʼə́. Koŋ ye wù koŋ wír vəə́ yòʼ wíy mày.

¹⁰Vèn wáa fo vibeerì e wun wo wù‑uù laàrìn wón vee vilum vee dzə́ə mbìyi veé Ejiv. Koŋ ye wù koŋ wír vəə́ yòʼ wíy mày.

¹¹Wù‑uù fə̀ə́r wír veé Isray fo Ejiv. Koŋ ye wù koŋ wír vəə́ yòʼ wíy mày.

¹²Wù‑uù fə̀ə́r e vitaáví və́ ve ghaʼán ví. Koŋ ye wù koŋ wír vəə́ yòʼ wíy mày.

¹³Vèn wáa fo vibeerì e wun wo wù‑uù jàvsìn Rìbà Ndzə̀v wo Baar, wù kfə́n mbìv sibaà. Koŋ ye wù koŋ wír vəə́ yòʼ wíy mày.

¹⁴Wù‑uù yiì, wír veé Israyi tósín. Koŋ ye wù koŋ wír vəə́ yòʼ wíy mày.

¹⁵Yii bèy, wù leér Farao wùn à shúu və́ rərí é Rìbà Ndzə̀v wo Baar. Koŋ ye wù koŋ wír vəə́ yòʼ wíy mày.

¹⁶Vèn wáa fo vibeerì e wun wo wù‑uù dànèrìn wír və́, e tòsín wóʼ shó. Koŋ ye wù koŋ wír vəə́ yòʼ wíy mày.

¹⁷Vèn wáa fo vibeerì e wun wo wù‑uù laàrìn afon ve ghaʼtíné. Koŋ ye wù koŋ wír vəə́ yòʼ wíy mày.

¹⁸Wù‑uù seèrí ve á yúʼnin yír yév. Koŋ ye wù koŋ wír vəə́ yòʼ wíy mày.

¹⁹Wù‑uù seè fon moo Sihon woo fon wìr veé Amor,

²⁰wùn Og woo fon woó Bashan,

²¹e nèn fò nsay yev ji vitsə́ʼ e wír veé Israyi. Koŋ ye wù koŋ wír vəə́ yòʼ wíy mày.

²²Wù‑uù fò e wír veé Isray ve á lim fo wune. Koŋ ye wù koŋ wír vəə́ yòʼ wíy mày.

²³Dzə̀ wun wo wù kù‑uù kuúme vèsən mo vé‑eè soon vèsən. Koŋ ye wù koŋ wír vəə́ yòʼ wíy mày.

²⁴Wù‑uù kuùmé, e nèn fə̀ə́r vèsən fo aŋgàa vibàn vesəné wo. Koŋ ye wù koŋ wír vəə́ yòʼ wíy mày.

²⁵Vèn wáa fo vibeerì e wun wo wù yiir wír, kìn nyám. Koŋ ye wù koŋ wír vəə́ yòʼ wíy mày.

²⁶Vèn wáa fo vibeerì e Nyùy, a wù dzə̀ é yuv. Koŋ ye wù koŋ wír vəə́ yòʼ wíy mày.