Read Lamnso Nsùyrì Nyùy 137 Bible Online

Nsùyrì Nyùy 137 - Lamnso bible

Nsùyrì Nyùy 137

¹Vèr‑iì sèsín fó nsay e ghaŋ se ndzəv seé Babilon, a kuumé Sion, a dìy.

²Vèr‑iì keèrì lúŋ sér sé nshì, é vici ve ví‑iì kúy fo ji yòv sèéy a ne.

³Wír ve vé‑eè koorin verí lo, á wàa tàʼ luŋ fo vèr, a suúy jii, «Vèn nyanyay ver e luŋ woo kùm Sione. Vèn yov luŋ wúmóʼó woó Sion, é vèr yú.»

⁴A dzə̀ vèr ghàn é le, e bó a yòv luŋ NYÙY TÀR, a vèr dzə̀ é nsay ye sən.

⁵A kí kòóy ji m laysin wò Jerusalem, kiwó kém ké yìy kí kù baàné, é m laysin móo kùm lúŋ.[149]

⁶Jerusalem, a m lò, a làysìn wò, e làa yòʼ a lì wò ji vijuŋ vém, a shaà vifá vidzə̀m, kiliímé kém kí kù koò e mǒ kilayláy, é la m yòʼ dzəə yù fó a yòv luŋ.

⁷Éè NYÙY TÀR, kuúmé kinyo ke wír veé Edome‑eè yiìn kí. Kinyo ke vé‑eè yiìn é kishiíy ke wír veé Babilone‑eè tònèn Jerusalem. Kuúmé mo áwune kù‑uù kwá jii, «Á ku kètì Jerusalem kétin, e dù, e mèé e kinsə̀ŋ.»

⁸Éè wìr veé Babilon, ven vé kighèʼe, bòŋ ké wìr ve á wíy siìr ŋkfə́tír, bìʼ kinyo ke vèn yiìn e vèr.

⁹Bòŋ ké wìr ve á wíy lì wón vén, e fòtì e vilan.