Read Lamnso Nsùyrì Nyùy 138 Bible Online

Nsùyrì Nyùy 138 - Lamnso bible

Nsùyrì Nyùy 138

¹[150] Éè NYÙY TÀR, m beerì wò shilív shém shidzə̀m, m yov, búri wò aànyùyí si.

²M gvə̀ʼtí ne, e kìʼ ŋgày yè cù ye ranén, a burí yír yé, bìʼ koŋ ye à kòŋ wír vé, tíy vèn áwune. À kòʼór ne yír yé wùn à jì yè e yuv, e shaà kifá kidzə̀m.

³Mò‑oò tòŋ e wò, à yú tóŋ yém, e tàvír shilív shém, e fò mo vitaáví.

⁴NYÙY TÀR, afon veé kitu ke nsay adzə̀me wíy a burí wò, bìʼ fo á yuun ne jí se sí fəə́ fo wò shuù.

⁵Áwune yíi a yòv, a taŋ vinyo ve à yii, bìʼ fo vikuʼùy vé vi dzəə̀n vigháʼtín.

⁶Fə̀m mo à dzəə̀n é ntoò yùv, à lo, à wàa leéy wír ve á li vitú vév shishàr. Yii bèy, lóo dzə vé kiŋkoʼòrwùné, à wàa leéy áwune kwaʼda kwaʼda.

⁷M lóo dzə e mvə̀m ŋgeʼ, à kìŋsìn dzəʼə̀m yém. À lo, à ràmsì kiwó ké, e sə̀r dòʼshwiíy wo wù kív aŋgàa vibàn vém, e lùŋèr mo e vitaáví vé vi.

⁸Rúrú, NYÙY TÀR, à kù wíy yiì kinyo kidzə̀m ke wò‑oò kàʼàn mo shó. Koŋ ye à kér fo wír vée yòʼ wíy mày. Lá à yòʼ màʼày wír vé ve wò‑oò bomen e wó yée.