Read Lamnso Nsùyrì Nyùy 139 Bible Online

Nsùyrì Nyùy 139 - Lamnso bible

Nsùyrì Nyùy 139

¹[151] NYÙY TÀR, à kàʼày ne shilív shém, e kìíy kinyo kém kidzə̀m.

²A m fə̀m dzə́ dzəə́n, kìn m tíy tiyín, bo à kì kinyo kém kidzə̀m. M lóo kwàʼtì kinyo, aà kiíy ne kidzə̀m.

³A m fə̀m ghán ghanén, kìn m néŋ neŋén, bo à kù yéné, aà kì kinyo kidzə̀m ke m yii.

⁴NYÙY TÀR, bo jì wáa fəə fo mǒ shuù, aà kiíy ne kinyo kidzə̀m ke m lo, a suúy.

⁵À lo, à gìŋ mo, à fó mbìy, à fó bàm. À kiŋsìn mo e vitaáví vé vi.

⁶Kí ghàʼ mo féyì mo à ghanen, e bóo kiíy kinyo kém kidzə̀m. Vifíi vé vi kùʼ feyì, a bó yòʼ dzə̀ vém ví mèʼ.

⁷A m lò, a leʼ ji m laáy fo wò si, m lèʼ kém, a dù a dzə̀ feé? A dzə̀ m lèʼ, e dù a dzə̀ feé, fo bó à yòʼ dzəə̀n?

⁸A m fə̀m kòʼ é yuv, bo à dzə̀ fó. M wáa neŋ aàŋkfəə́ wòŋ, bo à kù dzə̀ fó.

⁹A m fə̀m dù, e mèé fo shùy yii tó, kìn m dù, e mèé a dzə̀ fo yì yii nəə,

¹⁰bo à kù yíi a dzə fo, a dànèr mo e kiwó ké ki, a kìŋsìn mo e kóy wó wo tavíné.

¹¹A m sùúy ji ndzə ye sənér ku sùm mo, é rán ye yí giŋ moó kfə́n ji ndzə vitsə̀ʼ,

¹²bo ndzə ye sənér yòʼ sə́n fo wò. Vitsə́ʼ ví kù rán moo ndzə ye ranén, bìʼ fo vitsə́ʼ ví dzəə̀n moo rán bèy fo wò.

¹³Yì‑iì bòm wò vibar vém vé wùn vidzə̀m, e nàŋsín mo, e fèr e yè wór bvə̀m.

¹⁴M búri wò. À bòm mo é dzəə ye ghaʼtín. A wìr lèéy, shúu mà wun. Lim sé si dzə̀ sigháʼtín, a m kì kijuŋ feyì.

¹⁵Mo mò‑oò dzəə̀n e yè wór bvə̀m, à kù‑uù kì ji m dzə̀ á fo. Yì‑iì bòm wò vighvə́r vém, e lì ghán, e tàtí, a m kù kúy fo e kilìr.

¹⁶Wò‑oò yèn mo, a m dzə̀ə́ e mendzə̀v. Wò‑oò sìysì ne mo mò‑oò wíy dzə̀ʼə̀m, e meé, e sàŋ vishiíy vém e wò ŋwàʼ, e lèm, é bo á fəm wìy a dzəə́ mo.

¹⁷Àwáa, Nyùy, vinyo ve à kwaʼtì vi tàv é ŋàŋ fo m kiíy,[152] aá bàʼtí, ví wàa dzə nyanyày.

¹⁸A dzə̀ ji m wáa taŋ, ví wàa kùʼ, a shaà sí se siy. A dzə̀ ji a dzə̀ m tàŋ, bo a dzə̀ m shìíy rú moo wò.[153]

¹⁹Éè Nyùy, a dzə̀ ke réŋ kí, à kù laàr wír ve á méŋ wò, e jùm anjuyrìwìr fo mǒ ghaŋ, aá du kwaʼda.

²⁰Áwune yoŋ yír yé, táŋ a dzə̀ menàŋ. Aŋgàa vibàn víne kù lór wò lórín.

²¹Éè NYÙY TÀR, a dzə̀ m dzə̀ là fó a bàn wír ve á ban wò, e le? A dzə̀ m dzə̀ là fó a ŋway áwune ve á sí tsə́y kóy vèn áwune é le?

²²M ban áwune shilív shém shidzə̀m. M lì ne áwune ji aŋgaà vém vibàn.

²³Éè Nyùy, tàr mo, e kìíy kinyo ke kí dzəə̀n e mǒ shiliv kí. Taásín mo, e kìíy kwaʼtì yémé.

²⁴Leéy ó, e yèn ji m sà ghán e mbǒv kinyò ke bi kí á? Ku lèéy, a dànèr mo e wò mbòv wo dzəə̀n wo ruú ŋkuuŋkùŋ.