Read Lamnso Nsùyrì Nyùy 140 Bible Online

Nsùyrì Nyùy 140 - Lamnso bible

Nsùyrì Nyùy 140

¹[154] Éè NYÙY TÀR, bòyìr mo fo vé yiì ye bií wo, e kìŋsìn mo fo wír ve á téʼ wíri ji á lémérí.

²Ntaŋ wov kù dzə̀ ji á gheʼ wír, e bayír wíri, aá wáa fùnèn.

³Jí se sí fəə́ fo áwuné kilayláy sí dzə̀ ji ndzəʼ, ndzəʼ, wo dzə̀ wù yùyrí wír mo tè búv.

⁴Éè NYÙY TÀR, shìy mo fo wír ve bií. Kìŋsìn mo fo wír ve á téʼ wíri ji á lémérí. Áwune taʼ ji á laar mo láarin.

⁵Vé kiŋkoʼòrwùné wày ne vitám e kilìr, a teʼ mo shó. Á wày ne, à vé njoy vi, e tàm lálán, e kòʼór alíŋ é dzəə ji m li shó.

⁶M yoŋ e NYÙY TÀR jii, «À dzə̀ Nyùy wor.» Éè NYÙY TÀR, ku yù tóŋ yémé.

⁷NYÙY TÀR, Tàr wor, à dzə̀ ntav wo wù kiŋsìn mo. NYÙY TÀR, à kìŋsìn ne mo, moo ŋkeè e shùu rər.

⁸Éè NYÙY TÀR, lá à yòʼ fò kifá ke wír ve á méŋ wòo kér shií shó. Lá à yòʼ yiì, áàntaŋ vév virìme lim.

⁹Lá à yòʼ màʼtì, áàŋgaà vém vibàné gháʼ mo.[155] Bìnèr kighèʼ kév kí, é kí kfə́n aáwuné kitu.

¹⁰Və́yí ku gbù aáwuné kitu, aá gbu é bií ntùr, e làa yòʼ yu fóo fəə.

¹¹Lá wír ve á tóy vinyo e wírí bàmé yòʼ a kuy e kinyò ke á yii. Ké wìr ve á téʼ wíri ji á lémér, lòné ku jùmrì áwune cér, e laàr.

¹²NYÙY TÀR, m kì ji à yii leey fo vé kitàne, kiŋsìn gháy aghéʼncey.

¹³Rúrú, wír ve á yúnin wòo kù wíy a beèrì wò, a wír ve melív mev mè dzəə̀n tìítiyi wíy a ker kirə́ʼ kév ké dzə, a dzə̀ e wò si.