Read Lamnso Nsùyrì Nyùy 141 Bible Online

Nsùyrì Nyùy 141 - Lamnso bible

Nsùyrì Nyùy 141

¹[156] Éè NYÙY TÀR, m tóŋ e wò ji à ku sə̀ mo lèn lèn. M lóo toŋ, à kù yù tóŋ yém.

²Ku səə̀sí bunrì yém rə́ne ji kiláy ke á ton e wò, e səə̀sí wó ye m nan e yuv rə́ne ji cu yee ŋkuùr.

³Éè NYÙY TÀR, kìm shuu wómé. Ku tsə̀ʼ lám kisaŋe fo mǒ shuù.

⁴Ku yiì, é la shilív shém shí yòʼ a yeʼtí e kinyò ke bi kí. Ku yiì, é la m yòʼ a tatí wír ve bií, é vèr áwune wáa yiì vinyo ve bi ví. Ku tèér fo m tátí áwune, é vèr áwune wáa yinín kikóŋ.

⁵Wìr wo juŋ lóo roòmè jay wom, bo sì kinyo ke juŋ ki. Wù naarì mo náarin, bo sì mbùʼmé mo wù buʼ mo shó, a bó yòʼ dzə̀ m wàa ten. Ké wìr ve bi kí dzə̀, a m bunrì ghán sidzə̀m ji lá vinyo vév ví yòʼ a ghan.

⁶Á wíy way áwune e wír ve á tínen nsaʼ yeví kiwo, é wìr dzə̀m nèn biìmé ji kinyo ke Nyùy suuy ki dzə̀ á rú.

⁷Vighvə́r vév ví wíy taʼrí, a neŋ e ghaa sày, moo kilán ke á sanen, vinsév vi táʼrí é nsay.[157]

⁸Éè NYÙY TÀR, Tàr wor, m kù sí túyti sí a dzə̀ e wò wùn, leey ji à kiŋsin mo. Lá à yòʼ màʼtì mo, aá yúyrí.

⁹Kìŋsìn mo fó kitam ke á wayin ji m li shó, à fó alíŋ wìr ve á yii vinyo ve bi ví.

¹⁰Wír ve bií ku tò aáwuné alálán, alálán ve kù tamen áwune bìʼ mo. Á ku tò, é m boy kém bóyin fó fo.