Read Lamnso Nsùyrì Nyùy 143 Bible Online

Nsùyrì Nyùy 143 - Lamnso bible

Nsùyrì Nyùy 143

¹[159] Éè NYÙY TÀR, yú bunrì yémé, e yuùrí lón ye m lón wò ji à sə́ moó. Ku yù tóŋ yémé, bìʼ fo à yii tíy vèn à wír vée, tíy vèn áwune, yii vinyo vé là kiloʼ.

²M dzə̀ ŋgaà wò lìm, lá à yòʼ wày mo é kibàʼ ke nsaʼ. Bó yòʼ dzə̀ wìr wàa dzə là jay e wò si.

³Aŋgaà vém vibàné jwìm ne mo. Á jwìm ne, e sò mo ŋkuuŋkùŋ. Á fìn ne mo fó mesənér, m wáa dzə fo moo ŋkfəsày.

⁴Ghíri yòʼ dzə̀ə́ e mò, kindzə́m kí yùy ne mo.

⁵M kuúme ghán se sí‑iì shaàn, kuúme vinyo vidzə̀m ve à yiìn ne, m kuùmé lim se à lìmèn ne e Isray.

⁶M nan wó yém, nanè, tóŋ e wò. M yár jiŋ yè mo nsay ye yumér yàr ye wuù.

⁷Éè NYÙY TÀR, ku tàv yù tóŋ yémé, ghíri yòʼ dzə̀ə́ e mò. Lá à yòʼ màʼày mo, fo m du áàŋkfəə́ wòŋ.

⁸Kú a dìn mo koŋ yé kijàvndzə kidzə̀m, bìʼ fo m tiir vifií a dzə̀ e wò wùn. Dùŋrì mo dzə́ə mo dzə̀ m wàa ghan. Dùŋrìi, bìʼ fo m kù bunrì a dzə̀ wò.

⁹Éè NYÙY TÀR, bòyìr mo fo aŋgaà vém vibàné. M lèʼ ne, e lìr a dzə̀ e wò wùn.

¹⁰À dzə̀ Nyùy wo m suyrì. Yéʼéy mo kinyo ke à koŋ ji m wáa yiì. Ku yiì, é Kiyoy ké ke kí kù yii dzə́ kijuŋ ki wáa dànèr mo, é la kinyo ki yòʼ kòóy mo é dzəə.

¹¹Éè NYÙY TÀR, ku bòyìr mo, aá fíʼ a wùʼsì yír yé. Bìʼ koŋ ye à koŋ wír vé, ku lèm dzəʼə̀m yémé shó.

¹²Bìʼ koŋ ye à koŋ mo, yúyrí aŋgaà vém vibàné. Laàr wir dzə̀m wo wù nəʼsì mo, bìʼ fo m dzəə̀n ŋgaà lìm wò.