Read Lamnso Nsùyrì Nyùy 144 Bible Online

Nsùyrì Nyùy 144 - Lamnso bible

Nsùyrì Nyùy 144

¹[160] Á wáa burí NYÙY TÀR, dzə̀ wun kikiŋ kém. Wù yéʼey mo mo dzə̀ m màʼ rə́r, yii, a m báʼti rə́r kijuŋ.

²Wù dzə̀ ji kilán kém, kirə́ʼ ke kí kiŋsìn mo. Wù dzə̀ kóy wóm wo tavíné, a dzə̀ ŋgaà lùŋèr wom. Wù dzə̀ ŋkeè wom, a m lir a dzə̀ e wun wùn, a dzə̀ wun wo wù ton vitúm, lem e mǒ sar saʼ.

³Éè NYÙY TÀR, bo wìr msòŋ á ka, é bo à wáa kuumé, wan ŋkfə wìr, é bo à wáa geʼsín sho?

⁴Dzəʼə̀m wìri dzə̀ moo kiyúy, lo, yí ŋeèmé, e lày moo kindzə̀ə́ndzəm.

⁵Éè NYÙY TÀR, mvə̀ʼ yúví, e sə̀ʼə́y e nsay, e kùm agwane, aá wáa cu və́y, a fam kindzə́ʼ.

⁶Yìi, é kishèv ki njaʼam, e bàvìr sí aŋgaà vé vibàn, aá bvəə́rí. Tsə́nsí mvən sé si, e tàʼár áwune shó.

⁷Ràmsì kóy wóo fó yuv, e fə̀ə́r mo fó mvə̀m ŋgeʼ se sí ghíʼ mo. Bòyìr mo fo vitúm ví wo,

⁸wír, aá kù fəər a dzə̀ kimboʼtì fo shuù, lo, á wàa boʼtí kimboʼtì, a lìʼ ji dzə̀ á suuyrú.

⁹Éè Nyùy, m yíi a yòv luŋ wo fíyi, a sùyrì wò sho. M yíi a yòv, a kùm lúŋ nshì yee ŋgay e ghvə̀m.

¹⁰À yii, aàfone só aŋgaà vév vibàn, aà sə́ ŋgaà wò lìm woo Davir fo aŋgaà və́ vibàné wo.

¹¹Sə́ mo fo aŋgàa vibàn vémé wo, wír, aá yii kinyo là mendzən. Fəə́r mo fo vitúm ví wo, wír, aá kù fəər a dzə̀ kimboʼtì fo shuù, lo, á wàa boʼtí kimboʼtì, a lìʼ ji dzə̀ á suuyrú.

¹²Ku yiì, é wón vér vee wónlě nsùme wáa kuy, a tiy ji ŋkǐŋ moo kicí ke kí kuyin ne, e tìím, é wón vér vee wónlě ŋgòne wáa bòŋkìr moo wúr seé ntoʼ, wúr se á tuuyin ji sí wáa tom kór se lav seé ntoʼ kishìíy.

¹³Ku yiì, é vitáv vér vé vifa ve yi vi rúnkír. Ku yiì, é ví rúnkír, a jamtín e vifá ve yi vi kfəə́ si kfəə́ si, e yiì, é njiì wor wáa dzəə́ wón nyanyày, a run kwáʼ si.

¹⁴Ku yiì, é nyám sér sí wáa tsəə̀tìn tsəə̀tìn e kidzəə́y kí, é la kilày ki yòʼ a dzə, kìn ji sí dzə̀ akár, é la tóŋe yòʼ a koʼ e věr dzəə sí ji nyám si waà karì.

¹⁵Bòŋ ké wìr ve kisəəvì kee ben ki gbu aáwuné wùn. Bòŋ ké wìr ve Nyùy wov dzəə̀n NYÙY TÀR.