Read Lamnso Nsùyrì Nyùy 145 Bible Online

Nsùyrì Nyùy 145 - Lamnso bible

Nsùyrì Nyùy 145

¹[161] À dzə̀ Nyùy wo m ghvə́mé, à dzə̀ fon wo m lim fo fo, a m yíi a fèr, e wìy dù, e jòʼsì ji à dzə̀ á e gháʼtín.

²M yíi a burí wò kishiíy kidzə̀m, a wùʼsì yír yé, e wìy dù, e jòʼsì.

³NYÙY TÀR dzə̀ e gháʼtín, a dzə̀ á wàa burí wun feyì, a bó yòʼ dzə̀ wìr shoòshí vikuʼùy və́, e kìíy mo ví dzəə̀n.

⁴NYÙY TÀR, á kù wíy a burí lim sé, a burí, é ŋgwàʼ wáa fèr e yìmòʼ, a fìʼtì viŋgaʼnìn ve vinyò ve à yii.

⁵M wíy a suŋnín kùm vikuʼùy vé ve ghaʼán ví, a ruvtí viŋgaʼnìn vé ve lìm, a kwàʼtì sho.

⁶Wíri kù yíi a fìʼtì mo lim sé si dzəə̀n sigháʼtín. Á lóo fìʼtì, é m wáa fèr mo vikuʼùy vé vi dzəə̀n.

⁷Á yíi a fèr mo vinyo vé vi bòŋèn é ŋàŋ, a fuŋ yòv mo vinyo vé ve à yii yii tìítiy vi dzəə̀n.

⁸NYÙY TÀR yii shám wíri, kér mendzən, lo ji weè e dòʼshwiíy, din koŋ rə́ ye ghaʼáné e wíri.

⁹NYÙY TÀR yii kér wir dzə̀m kijuŋ, rə́r mendzən me kifa ke wù‑uù bomen kidzə̀m.

¹⁰Rúrú, NYÙY TÀR, kifá kidzə̀m ke wò‑oò bomen kí yíi a burí wò, é wír ve dzəə̀n vée wáa wùʼsì yír yé.

¹¹Á yíi a fèr mo vifon vé vi dzəə̀n vigháʼtín, a fèr mo vitaáví vé vi dzəə̀n,

¹²é wìr dzə̀m fíʼ a kiíy viŋgaʼnìn ve vinyò ve à yii, a kiíy mo vifon vé vi dzəə̀n vigháʼtín.

¹³Vifon vé vi dzə̀ vifon, a bó yòʼ dzə̀ ví mày, a sáʼ yée kù wíy a tiy fo e ŋgwàʼ sí ŋgwàʼ si, là may. NYÙY TÀR kù yii tíy e wun jì, a vinyo ve wù yii vidzə̀m vi kù din mo wù dzəə̀n e juŋ.[162]

¹⁴NYÙY TÀR yii távir wir dzə̀m wo shilív shí seèmèn ne, nan ve á gbùkìn ne.

¹⁵NYÙY TÀR, kifá ke ŋeʼèn kidzə̀m ki kù kiʼ a dzə̀ wò. Kí kù kiʼ a dzə̀ wò, aà yiir áwune é ghan.

¹⁶À yii kér wó yé tèéter, yii, a kifá kidzə̀m ke ŋeʼèn kí yíkir, kúrí.

¹⁷NYÙY TÀR yii kinyo kidzə̀m là kiloʼ, a vinyo ve wù yii vidzə̀m vi kù din mo wù dzəə̀n e juŋ.

¹⁸NYÙY TÀR dzə̀ kibáʼtín fóo sə wír ve á mbaa wun. Wír feyì ve á mbaa wun shilív shimòʼón.

¹⁹Wù fó vifá ve wír ve á ghvə́m wune kér shií shó, yú tóŋ yév, luŋèr áwune.

²⁰NYÙY TÀR yii kiŋsìn wír ve á koŋ wun, a wù wíy laàr wír ve á méŋ wun láarin.

²¹M yíi a burí NYÙY TÀR ghán sidzə̀m. Kifá ke Nyùy‑iì bomen kidzə̀m ki kú a wùʼsì yír rə́ ye ranéné, e kù a wùʼsì, e dù, e jòʼsì.