Read Lamnso Nsùyrì Nyùy 146 Bible Online

Nsùyrì Nyùy 146 - Lamnso bible

Nsùyrì Nyùy 146

¹Á wáa burí NYÙY TÀR. M yíi a burí NYÙY TÀR, a burí feyì shilív shém shidzə̀m.

²M kù wíy a burí NYÙY TÀR, e dù, e meé mo m wíy kpu. Mo m dzəə̀n e tin, m kù yíi a yòv luŋ, a burí Nyùy sho.

³Lá vèn yòʼ a tiír vifií vén e wìr wùn ji dzə̀ wír wo kuʼùn. Kù dzə̀ wír fo wìr, a bó yòʼ dzə̀ wù sə̀ ven.

⁴Wù kpú, wù kfə̀n é nsay, e kèʼ fo kishiíy fóo fèy, antaŋ vəə́ nèn lày kisáŋ.

⁵Bòŋ ké wìr wo ŋgaà sə və dzəə̀n Nyùy Jakov, wír, wo vifií və́ ví kù tíy a dzə̀ e NYÙY TÀR woo Nyùy və́ wùn,

⁶wun woo Nyùy wo wù‑uù bomen yúv wùn à nsay, e kfə̀n bòm rìbà ndzə̀v, à vifá ve ví dzəə̀n shó vi vidzə̀m. NYÙY TÀR kù yii tíy e wun jì ghán sidzə̀m,

⁷bin nsaʼ wìr ve á nyavrì sho, a dzə̀ é nsànloŋ, fó sa vifá ve yi e wír ve jìŋ yáríi. NYÙY TÀR boyìr vé sháŋé.

⁸NYÙY TÀR mvəʼtì sí se amfìr, nan wír ve á gbùkìn, koŋ wír ve á yúnin wun.

⁹NYÙY TÀR leey fo abeèshàa. Wù leey sa fo vikǐy ŋkfəə, leey fo wón vee alàtàrí. Yii bèy, ké wìr ve á méŋ wun ki dzə̀, a wù yii, aàntaŋ véví korkìr kòrkìn.

¹⁰Wír veé Sion, NYÙY TÀR wíy a saʼ vifon ghán sidzə̀m. Wun woo Nyùy won kù wíy a saʼ e ŋgwàʼ sí ŋgwàʼ si. Á wáa burí NYÙY TÀR.