Read Lamnso Nsùyrì Nyùy 147 Bible Online

Nsùyrì Nyùy 147 - Lamnso bible

Nsùyrì Nyùy 147

¹Á wáa burí NYÙY TÀR. Kí bòŋ fó a yòv, a burí Nyùy wòsən. Kí bòŋ rú, e ghèén feyì ji á wáa yòv, a burí wun.

²NYÙY TÀR kfə̀n sí baʼrì Jerusalem. Wù li wír veé Jerusalem fo kwaʼ nsàm, li áwune, kfə́n sho e bàm.

³Wù kúv melív me wìr ve á dzə́ e mvə̀m mendzə̀n. Wù kúv melív mev, ndzə́m vileémé vév.

⁴Wù kì mo mejiy mè dzəə̀n, yoŋ e yír yir, kù mo mè dzəə̀n.

⁵NYÙY TÀR dzə̀ e gháʼtín, kér vitaáví e shaàsìn, a vifií və́ ví dzə̀ là mfìʼ.

⁶NYÙY TÀR yii nan wír ve á nəʼsì áwune, sə́ʼsi wír ve á méŋ wun e kibvə̀r.

⁷Vèn wáa yòv luŋ si, a burí NYÙY TÀR shó, a kùm lúŋ, é wù wáa yu kiléŋléŋ.

⁸Wù lo, wù sə̀tí yúv e mbàʼ, e fə̀ə́r wuú, yí wàa lo e nsay, jíyí wàa kuy aàgwan.

⁹Kù fó wun vifá ve yi e nyám si, a yiir wun wón viŋaʼ ve á tóŋnin jíŋ.

¹⁰Wù yòʼ yú vijuŋ ve wíri ji á dzə̀ á antav. Wù yòʼ yén nyám sév sé ŋkoʼ, wù yòʼ yén vé rər vév ve tavkíné.

¹¹Wù yii yú vijuŋ a dzə̀ vé wìr ve á ghvə́m wun, leey a dzə̀ áwune ve á koŋ wír və́, tíy wùn áwune.

¹²Wír veé Jerusalem, vèn wáa burí NYÙY TÀR. Wír veé Sion, vèn wáa burí Nyùy won.

¹³Wù kiŋsìn ŋkàlaʼ yen, səəvì wír vén ve á dzə́ sho.

¹⁴Wù yii, a nyaáŋ dzə́ e věn bìíy se wòŋ, fó ven vifá ve yi, a dzə̀ vé ntay vi.

¹⁵Wù tsə́nsi sáʼ rə́ é kitu ke nsay, yí nèn kù ghànén cércér.

¹⁶Wù saŋrì kfə́m mo á sàŋrì bvə̀ràŋgí, yii, a kintòn ki gbu, a viŋgà ví yúm vidzə̀m.

¹⁷Wù lo, wù tsə̀nsí mentíy, mè wàa gbù moo waár. Dzə̀ la wo yòʼ dzə̀ wù tàvtí é kintòn ke Nyùy tsənsin?

¹⁸Wù fó sáʼ, mentíy mè nèn rèŋ, tsə́nsi shwér və́, a wú shaa, a ndzə́ví léŋé.

¹⁹Wù lo, wù wàa fìʼtì kinyo kfə́ e rám Jakovi, a yiì, wír veé Israyi wàa kiíy sáʼ rə́ wùn à kinyo ke wù tínen ki.

²⁰Bó wù yóʼ ne yiì e kitúm kímóʼ kí bey. Bó vitúm vi yòʼ kì kinyo ke wù yii tínenè. Á wáa burí NYÙY TÀR.