Read Lamnso Nsùyrì Nyùy 17 Bible Online

Nsùyrì Nyùy 17 - Lamnso bible

Nsùyrì Nyùy 17

¹[19] Éè NYÙY TÀR, yú kinyo ke m tóŋ ji à tínén é nsànloŋ ki, Ku yù tóŋ yémé, yú bunrì ye m yii là kiloʼo.

²Ku tìnén nsaʼ, e fò e mò. Ku wày síi é kinyò ke kí dzəə̀n réŋ kí.

³À kì mo shilív shém shí dzəə̀n, aà wìy ne, e ghàn mo vitsə́ʼə́, e tàr mo kijuujùŋ, e yèn, a bó m yòʼ tíy e kinyò ke bi kí.

⁴M yòʼ jumrì yíi wìr msòŋ ye bií. M yú kém a dzə̀ fo wò nsər, baʼàr dzə́ə sé melaà sidzə̀m.

⁵M kù yii jumrì a dzə̀ ye yee dzə́ə, a bó m yòʼ‑oò yiì ne lèrìr fo fo.

⁶Éè Nyùy, m tóŋ a dzə̀ e wò, bìʼ fo à yíi yu tóŋ yém. Ku tèér kituʼùr kí, e yù bunrì yémé.

⁷Éè Nyùy, wò wo à luŋèr wír ve á lir e wò sar, kim áwune fo aŋgaà vév vibàné e kóy wó wo tavíné. Ku dìn mo koŋ yé ye ghaʼtíné.

⁸Kìŋsìn mo mo wìr kìŋsìn wan si və bey, lìtì mo e wò sar vàv.

⁹Sə́ mo fo wír ve bií, á taʼ ji á laar mo ŋkuuŋkùŋ. Aŋgaà vém vibàné gìŋ ne mo e tàr, a tàʼ ji á yúyrí yuyrín.

¹⁰Á yòʼ kér mendzən gheéy, á súŋnin, kóʼor a dzə̀ wún.

¹¹Á sí wóŋ wúu yém mbìv sidzə̀m, túyti sí ji á ku sèn mo é nsay.

¹²Á taáme mo, táʼ sàtì mo taàmé bvərə̀ʼ bey, gvə́rin, taáme mo é kilìr moo wan bvərə̀ʼ.

¹³Éè NYÙY TÀR, làŋsìn vèn áwune, e neèr ndzə̀m yev é nsay. Bòyìr mo fo wír ve á méŋ wò vìne e vitaáví vé vi.

¹⁴Éè NYÙY TÀR, nàn kóy wóo, e bòyìr mo fo wír vìne. Ku laàr áwune fó nsay fèn. Sə́ʼsí kilíŋ kév kí, aá lay fó wòŋ. Ké wìr ve à koŋè, à yíi rəə̀r jíŋ yev, é wón véví kú a ker ké a yi, é kí wáa jàmtìn, aá koóy keé lèm sa e wón véví.

¹⁵M dzə̀ kém, a m wíy shov wò e si, bìʼ fo m ghán a dzə̀ e wò mbòv. M wíy lóo yìmèn fo mbuùné, lóo yen wò mo à dzəə̀n, é kí gheén mo féyì.