Read Lamnso Nsùyrì Nyùy 18 Bible Online

Nsùyrì Nyùy 18 - Lamnso bible

Nsùyrì Nyùy 18

¹[20] NYÙY TÀR, m wày ne wò e shiliv, dzə̀ wò vitaáví vém.

²Rúrú, NYÙY TÀR dzə̀ kilán kém, kirə́ʼ ke kí kiŋsìn mo. Wù dzə̀ Mfə̀ə́r wom. Nyùy wom dzə̀ kirùmèn kém ké nsàm. Wù dzə̀ ŋkeè wom. Wù dzə̀ ntav wo wù luŋèr mo, kirə́ʼ kém ke tavín kí.

³Búríi kú a dzə fo NYÙY TÀR. M tóŋ e NYÙY TÀR, a wù sə́ mo fo aŋgàa vibàn vémé wo.

⁴Kpúu‑uù ghàr ne mo, e kùr kúrín, ndzə́v ye yí laar wírií súm mo.

⁵Vitám ve kpu vi‑iì koò mo, a m sí du aàŋkfəə́ wòŋ.

⁶Ŋgeʼ si‑iì rùn e mǒ kitu, m tóŋ e NYÙY TÀR. M rəə́mé Nyùy wom ji wù sə́ á mo. Tóŋ yémé tó e wun kitùʼùr, wù yú jí yem e wun lav cù.

⁷Nsay nèn a sə̀ʼsì, a kar, sár se agwan si wáa sə̀ʼsì sa. Virə́ʼ ví wáa kar, bìʼ fo Nyùy‑iì shwiiy kilòŋ.

⁸Kindzə́ʼ ki wáa mee fo wun yuy, və́yí wáa fəə fo wun shuù. Wù tsə́nsí káy se və̀y fó yuv, sí tòn virə́ʼ.

⁹Wù shúʼ yúv, a səʼə́y e nsay, a mbàʼ ye sənér dzə̀ e wun sar wuù.

¹⁰Wù kóʼ e *kifá keé yuv ke kí kér vav si kí ndzə̀m, a feŋ, a wìy. Wù dzə́ʼə́m é kitu ke mbàʼ, a wìy e shwer.

¹¹Wù sə́tí kitú kfə́ e ndzə ye sənér, kikfə́m ke mbàʼ ki súm wun, mbàʼ, a yì sə́n ji cùm.

¹²Wuú njáʼám fo wun mbìy, e fə̀ə́r káy se və̀y, mentíy mè wáa tosín mbàʼ ye sənér, a gbù.

¹³NYÙY TÀR súŋnín fó yuv. Á yú jí Taà Vitu, a yì báykir e yuv, fəər káy se və̀y, a mentíy mè gbu.

¹⁴Wù tsə́nsí mvən sə́, e tàʼár aŋgaà və́ vibàn. Wù túm kishèv, kí njáʼám, e bvə̀ə́r áwune.

¹⁵Àháà, NYÙY TÀR, à wàm ne aŋgaà vé vibàn. À fèr yúy yé, shwéri tsə́y áwune, ambuŋ veé rìbà ndzə̀ví yénsín, kinsə̀ŋ ke nsay ki fəə́sín fó meranén.

¹⁶NYÙY TÀR ràmsì kiwó kfə́ fó yuv, e ghàr mo shó, e fə̀ə́r mo fó mvə̀m ndzə̀v ye shoóné.

¹⁷Wù fəə́r mo fo ŋgaà wom vibàn wo tavín wo. Wù sə́ mo fo wír ve á ban moó, aá sí táv, gháʼ mo.

¹⁸Mò‑oò dzə̀ é mvə̀m ŋgeʼ, áwune kaáy mo, yii bèy, NYÙY TÀR ku tòm mo.

¹⁹Wù fə̀ə́r mo fo áwuné wo, m bóy. Wù bòyìr mo, bìʼ fo wù‑uù leey mo, koŋè.

²⁰NYÙY TÀR laámé mo, bìʼ fo m yúnin wun, e laàmé feyì, bìʼ fo bó m yòʼ kér jay.

²¹M kù‑uù ghán a dzə̀ e NYÙY TǍR mbòv, m yòʼ‑oò lo màʼtì dzə́ə rə, e bìn e ye kisaŋ.

²²Mò‑oò yúnin vinyo ve Nyùy‑iì tinen vidzə̀m, m yòʼ‑oò lo ŋwày sáʼ rə́.

²³Mò‑oò dzə́ là shilóm e wun si, jámer kitú kém fó kinyò ke bi kí.

²⁴Á bèy, NYÙY TÀR laámé mo, e laàmé feyì, bìʼ fo mò‑oò yúnin wun, dzə́ là jay e wun si.

²⁵NYÙY TÀR, à yii tíy vèn à wír ve á tíy e wò wùné. À yii dzə́ là shilóm vèn à wír vee là shilóme.

²⁶À kér shilív she juŋ shi vèn à wír ve á kér melív me juŋ mè, din nyár yé e wìr wo wù yòʼ ghán tìítiy.

²⁷À sə́ wír ve á yòʼ yén vitú vév, sen wír ve á kóʼor wún.

²⁸NYÙY TÀR, à dzə̀ rú kikaʼày kém, à bìnèr ndzə yem ye sənér, yì kfə́n ji ye ranén.

²⁹NYÙY TÀR, à fó mo vitaáví, ve a dzə̀ m fùnèn shimbeʼ she wìr, e kfə̀n lìy kay ye á bomen, e kaàrí ŋkàlaʼ sho.

³⁰Nyùy dzə̀, a wù yii vinyo vidzə̀m tìítiy. Ŋkàʼmé NYÙY TÀR kù yii tíy fo. NYÙY TÀR dzə̀ ŋkeè wìr dzə̀m wo wù tiir wun fo mbìy.

³¹Dzə̀ la Nyùy, e shaà NYÙY TÀR, a dzə̀ la kilán, e shaà Nyùy wor?

³²Dzə̀ wun wo wù fó mo vitaáví, binèr dzə́ə ye m ghán sho e mboʼ.

³³Wù yii, a wuú yémé caʼ moo yé nshà, a m ghán kicaárín é vitu ve aŋkoŋ.

³⁴Wù yéʼey mo mo dzə̀ m màʼ rə́r. Wù távir mo, a m maʼ kinte ke kishà ki.

³⁵NYÙY TÀR, à kiŋ mo e ŋkeè wò, a m luŋ e shùu rər. À tóm mo e kóy wó yìyí. Mo à tíy e mǒ ghaŋ, m kfə̀n ne ji ntav.

³⁶À fò mo kirə́ʼ é shùu rər, wuú yémé tiím, la m yòʼ lèrìr.

³⁷Mò‑oò jùm aŋgaà vém vibàn, e koòrí, yòʼ‑oò dzə̀ m kfə̀n é bàm, a bó m laár áwune.

³⁸M sóvtí, la wìr yòʼ kfə̀n ŋàʼáy e yuv. Á kpúkír adzə̀m e mǒ sar wuù.

³⁹Wò‑oò fò mo vitaáví vé rər, m gháʼ aŋgàa vibàn vém adzə̀m.

⁴⁰Áwune yú wó yém ntéŋ, a leʼkír, m ku laàr áwune láarin.

⁴¹Á wáa toŋ, a lon sə́mo, la wìr yòʼ a dzə wóo sə áwune. Á wáa toŋ, à fo NYÙY TÀR shó, la wù yòʼ yuùrí.

⁴²M jò áwune, á dù e kibvə̀r, shwéri wáa feér. M nyèŋrì áwune mo á nyèŋ kishaʼàr é dzəə.

⁴³À sə́ mo, m gháʼ wír ve á tsə́y kóy vèr áwune. À lém mo, m wáa dzə taà saʼ fo vitúm vi, vitúm ve bó m yòʼ‑oò kiìn ví wáa shwi mo.

⁴⁴Áwune yú jí yem, á kù yùnín yunín, vitúm vi wáa neŋ, a yàʼ e mǒ si.

⁴⁵Wúmé kpú fo áwuné bvə̀m, á wáa yàʼ, a meekír fo virə̀ʼ ve ví kiŋ áwune.

⁴⁶NYÙY TÀR dzə̀ shó e tin. Dzə̀ wun kirùmèn kém ké nsàm. Á wáa burí wun. Á wáa wùʼsì yír Nyùy woo Ŋgaà Lùŋèr wom,

⁴⁷wun woo Nyùy wo wù‑uù səən mo, m tón aŋgaà vém vibàn, e bàʼ áwune e mǒ sar.

⁴⁸Dzə̀ wun wo wù‑uù fəərin mo fo aŋgaà vém vibàné wo. Rúrú, NYÙY TÀR, wò‑oò kòʼór mo aàŋgàa vibàn vémé kitu. Wò‑oò bòyìr mo fo vé kinjuyrìí wo.

⁴⁹Bìʼ bey, NYÙY TÀR, m yíi a nàn vikuʼùy vé e vitúm ví mvəm. M yíi a yòv, a wùʼsì yír yé.

⁵⁰Rúrú, NYÙY TÀR leey fo fòn wo wù shoʼon, fó wun vitaáví, a wù ton vitúm vinín. Wù din koŋ rə́ ye wiyí e wìr wo wù yoʼon, din e Davir wùn à rám rəə́, e dù, e jòʼsì.