Read Lamnso Nsùyrì Nyùy 19 Bible Online

Nsùyrì Nyùy 19 - Lamnso bible

Nsùyrì Nyùy 19

¹[21] Yúví fiʼtì vikuʼùy vé Nyùy, a kikum keé yuv kí din viŋgaʼnìn və́ vé lìm.

²Kishiíy kí kù bí kímóʼ kí vikuʼùy vé Nyùy, a vitsə́ʼ ví kù bí vímóʼ ví mo vifií vé Nyùy vi dzəə̀n.

³Vifá veé yuv vin vi yòʼ súŋnin moo wír, ví yòʼ kér jí kisuŋnìn, a bó á yòʼ yú jí yev.

⁴Yii bèy, a jí sév sí kù dunìn kitú ke nsay kidzə̀m, a sáʼka wov ghánen vitóŋtóŋ vé ndzə vidzə̀m. Nyùy‑iì bàʼrì kikum e yuv, e lèm shúy sho.

⁵Yì lo, yì wàa fəə mo wánlè nsùm yù ndzə́ʼ jìn, e meè fó lav, kìn moo wír wo wù túyri shwín ji wun léʼ kileʼ.

⁶Shùy lo, yì tò fó buu ndzə wúmóʼó, kárí, yì dù nə̀ə́ e wúmóʼó, a bó yòʼ dzə̀ kifá ki lèʼ lum ye yí fəə́ fo fo.

⁷Yéʼéy NYÙY TÀRí dzə̀ e juujùŋ feyì, yí fíyir kiyoy ke wìr. Kinyo ke NYÙY TÀR foon kí kù tíy fo, yii, a wír vee fó tèri kér vifií.

⁸Ntò se yeʼéy se NYÙY TÀR foon sí dzə̀ tìítiy, fó vijuŋ e wìr wo wù yúnin wun. Nsər se NYÙY TÀR sí wáa dzə là nsem, mvəʼtì sí se wíri.

⁹Ghvə́m yé a fo e NYÙY TÀRí bòŋ feyì, yí kù wíy a dzə, e dù, e jòʼsì, a vinyo ve NYÙY TÀR tínen vi kù dzə̀ rú, ví kù yii dzə́ vijuŋ ghán sidzə̀m.

¹⁰A dzə̀ á wàa ker shií é kinyò ke Nyùy, e shaà mó a diy *kisha ke mbàm ke baar kí, fə̀m dzə̀ ke kuʼùn kí ke á tònèn, e shèŋrì. Kinyo ke Nyùy ki nyòm, e shaà vilu, woó vilù ve ví shém fo ghàm si.

¹¹Rúrú, NYÙY TÀR, vinyo vé vi tír ŋgaà lìm wò, m lóo yunín, m wàa ker vilaámé vigháʼán.

¹²Yii bèy, wìr yòʼ yii yén ndzə̀m rə. Sù ajay vém ve á yòʼ yénsinèe.

¹³Kìm mo fó yìíkum. Lá à yòʼ màʼtì, é wù sum mo. M rán fo fo, é m wiy a dzə là nsem, e bàʼàr njò yee bìʼ yii ye bií.

¹⁴Kú a sheʼrí rì jí sém sí, à kinyo ke m kwaʼtì, rémri e mǒ shiliv kí, NYÙY TÀR, Kikiŋ kém, Ŋgaà Lùŋèr wom.