Read Lamnso Nsùyrì Nyùy 2 Bible Online

Nsùyrì Nyùy 2 - Lamnso bible

Nsùyrì Nyùy 2

¹Vitúm vi kár menàŋ bìʼ ka? Á bá antaŋ ve bó yòʼ dzə̀ á tìím ji ka?

²Afon veé nsayi báʼti rə́r, aàtǎr wòŋe dzəʼə̀m, táŋ sáʼ NYÙY TÀR, táŋ sáʼ ŋgaà wo wù yoʼon ji fon.

³Á suuy jii, «Vèsən ku tùmnín fo áwuné wo, vèsən ku tèn sáʼ yév.»

⁴NYÙY TÀR dzə́ kfə́ e wun kàvàʼ e yuv, leey áwune, shéʼ sheʼén.

⁵Wù súŋnin aáwune e wun mvə̀m dòʼshwiíy, bémer áwune, suuy jii,

⁶«Mómò, m kòʼór ne wóom woo fon, e lèm e Sion woo gwan wom wo ranén.»

⁷Fòn suuy kfə́ jii, «M yíi a fìʼtì sáʼ NYÙY TÀR. Wù‑uù sùúy e mò jii, ‹À dzə̀ wán wom, a m sì tàr won lán.

⁸Lón mo, é m fó vitúm vìn vidzə̀m ji vitsə́ʼ vé, é kitú ke nsay kidzə̀m ki wáa dzə ké.

⁹À wíy dzə̀v áwune e mbàŋ kishà, e bvəʼtí áwune mo á bvə̀ʼtí ntòn mbóm.› »

¹⁰Éè afon, vèn wáa dzə atòŋ lèn. Éè atǎr saʼ veé nsay, vèn sə́ʼə́m.

¹¹Vèn wáa ghvəm NYÙY TÀR, a fàn, a yàʼ, fóo jay kinyo.

¹²Vèn wáa bùn wun e shiliv she juŋ shi,[1] fo wù lo, e shwìíy kilòŋ, e laàr ven, bìʼ fo dòʼshwíiy və yii ŋáʼay cér. Bòŋ ké wìr ve á lir e Nyùy sar adzə̀m.