Read Lamnso Nsùyrì Nyùy 21 Bible Online

Nsùyrì Nyùy 21 - Lamnso bible

Nsùyrì Nyùy 21

¹[23] NYÙY TÀR, fòn shéʼri wò bìʼ vitaáví vé ve ghaʼán ví, wù séŋ, savnìnè, bìʼ fo à yiìn ne, wù só aŋgaà və́ vibàn.

²À fò ne wun kifá ke shilív sə́ shí tíy sho, bó à yòʼ‑oò lo ŋwèy wun kinyo ke wù‑uù lonen fo wun shuù.

³Wò‑oò səə̀sí wun, e fò wun afómo ve juŋe, e sòv ntáráʼ kishà ke mbàm ke baar kí e wun kitu.

⁴Wù‑uù lòn ji à kim á dzəʼə̀m rə́, à kím, e fò dzəʼə̀m sho e da wùn à rámé là may.

⁵À yiì ne, leŋ vəə́ dúnén mo à tomen wun e shùu rər, wù só. À fò ne wun vitaáví ve ghaʼán ví, wù wáa saʼ wíri shó.

⁶À yiì ne, wù wáa dzə wir kisəə̀vì, e dù, e jòʼsì, wù yú vijuŋ, bìʼ fo à dzəə̀n e wun mentsə̀m.

⁷Rúrú, fòn wày shilív a dzə̀ e NYÙY TǍR wùn, a bó yòʼ dzə̀ kifá ki sə̀ʼ wun, bìʼ fo Taà Vitu koŋ wun e ŋàŋ.

⁸Nyàr, fòn yíi koo a aŋgaà və́ vibàn e wóo, e koo wír ve á ron wúu rə́ adzə̀m.

⁹Fòn wíy fəəsín, e laàr áwune mo və́yí laàr kifá. NYÙY TÀR wíy shwiíy kilòŋ, e laàr áwune, aá shwí, e rèŋ.

¹⁰Fòn wíy səʼsí rám yév fó kitu ke nsay, a wàn vin yòʼ wíy gòʼ aáwuné mvəm.

¹¹Aŋgàa vibàné kár a menàŋ e fòn bàm, a bó yòʼ dzə̀ kí dù.

¹²Fòn yíi a màʼ áwune e mvən si, aá wáa bìnkìr, a nyeŋkír.

¹³Feyì NYÙY TÀR, vèr nan yír yé e yuv bìʼ vitaáví vé, vèr yíi a yòv, a burí wò bìʼ vinyo ve ghaʼtín ve à yii.