Read Lamnso Nsùyrì Nyùy 22 Bible Online

Nsùyrì Nyùy 22 - Lamnso bible

Nsùyrì Nyùy 22

¹[24] Nyùy wom, Nyùy wom, à màʼày mo ji ka? M diy, kpú kpuún, aà dzə́ kwaʼda fóo sə mo ji ka?

²Éè Nyùy wom, m tóŋ e shùy, a bó à yòʼ yú tóŋ yém. M tóŋ vitsə́ʼə́, a bó m yòʼ kér meemè gheéy.

³Yii bèy, à kù dzə̀ ké ji Ŋgaà wo Ranén. À dzə́ e wò kàvàʼ, a wír veé Israyi kwá wò kwaán.

⁴Atàr vérí‑iì wày shilív a dzə̀ e wò wùn, á wáy, à fəə́r áwune fó ŋgeʼ.

⁵Vé‑eè tòŋ e wò, à lúŋér áwune. Vé‑eè tìír vifií e wò wùn, la à yòʼ màʼ áwune.

⁶Yii bèy, kém kí dzə̀, a bó wíri yòʼ yén mo ji wír. Á yén mo ji kiŋgoóŋgoŋ, shoor mo, kfə̀n ŋwáyí.

⁷Wír ve á yén moó kù jaʼ mo jáʼan adzə̀m, á rom mo e ntù shuù, sheŋ kitú, suuy jii,

⁸«Wù wày ne kinyo kfə́ a dzə̀ e NYÙY TǍR kiwo, wù sə́ ri wun, wù boyir ri wun ji wù tìír vifií a dzə̀ e wun wùn.»

⁹Yii bèy, dzə̀ wò wo wò‑oò fəərin mo fo yè wór bvə̀m, géʼsin e mò, aá dzəə́ nyoor mo.

¹⁰Mo yè wor‑iì dzəən mo, m kù yéʼti a dzə̀ e wò wùn, aà kù dzə̀ Nyùy wom ghán sidzə̀m.

¹¹Lá à yòʼ a dzə kwaʼda fo mò, ŋgeʼ si sí méʼ mo, a wìr wóo sə mo yòʼ dzə̀.

¹²Aŋgàa vibàné gìŋ ne mo anín mo gìŋ ambòŋ, á gìŋ ne mo adzə̀m, e tàr moo vintav ve ambòŋ veé nsay Bashan.[25]

¹³Aŋgaà vém vibàné lo, á ŋàŋ shuu, e lèm e rə́, a kìʼ mo shó, moo bvərə̀ʼ wo wù nyamkìrì, taʼ nyám yée koo.

¹⁴Vitaáví vém ví nyòóy ne e mày, e nyòóy moo mendzə́v me á səə̀rìn fó nsay, a vighvə́r vém ví sìmsìn ne, shilív shí yaáné mo moo ghám vilù.

¹⁵M yùm ne moo kimbvə́ʼ ke láŋ, a vitaáví vém ví mày ne. Kiliímé kém kí bárín e mǒ kilayláy, aà fò ne mo e kpúu.

¹⁶Ŋgoo wìr ve bií gìŋ ne mo, e tàr mo ŋgoo jwi gìŋ nyám, sovtì wó yém wùn à wuú.[26]

¹⁷A dzə̀ m tàŋ vighvə́r vee mǒ wùn vidzə̀m. Aŋgaà vém vibàné túyti sí, leey mo shó.

¹⁸Á lì ndzə̀y sém, a jàv. Á lì ne kikúm kém, a tsəm kàŋ sho.

¹⁹Éè NYÙY TÀR, lá à yòʼ dzəə gòʼ kwaʼda fo mò. Éè Nyùy woo ŋgaà sə wom, ku wìy cér, e sə̀ mo.

²⁰Lá à yòʼ màʼtì, áàŋgaà vém vibàné gwati mo e nyùy. Fəə́r mo fo jwí sìn sí wo.

²¹Sə́ mo fo abvərə̀ʼ viné shuù, e sə̀ mo[27] fo ambòŋ veé kwaʼ vìne sovti.

²²M yíi a fèr kinyo ke à yii aàfə́r vémé, a burí wò e mvə̀m kintatì ke wìr Nyùy.

²³Ven ve á yúnin NYÙY TÀR, vèn wáa burí wun. Ven vee rám Jakov adzə̀m, vèn wáa koʼór yír rə́. Ven vee rám Isray, vèn kú a tiy e wun si, a yàʼ.

²⁴Wù yòʼ‑oò ló a nyàysì wun wo vé‑eè nyavrì sho, a bó wù yòʼ‑oò lo màʼtì wun. Wù yòʼ‑oò lo bìn ndzə̀m e ŋgaàŋ, ŋgaàŋ‑eè tòŋ, wù yú tóŋ rə́.

²⁵À dzə̀ tím nsùyrì wom, a m suyrì wò e màŋgòŋ wìr vée mvəm. M yíi fo nyám sé se mò‑oò kàʼàn, a cù wò sho e wír ve á yúnin wòó si.

²⁶Vé ŋgeʼe yíi a yikír, a kur, wír ve á kóʼti e NYÙY TǍR sii yíi a burí wun. Nyùy ku fò áwune vijuŋ, e dù, e jòʼsì.

²⁷Vitúm vidzə̀m veé kitu ke nsay vi wíy bìnkìr, a kuumé fó a burí NYÙY TÀR, é kfəə́ sidzə̀m si wáa koʼtí e wun si, a ghvəm wun.

²⁸Kù kér NYÙY TÀR sáʼ, a vitúm vi kù yú a dzə̀ fo wun.

²⁹Rúrú, vé kindìnwùn adzə̀me wíy gbù e wun si, é wìr msòŋ wiy, e tsə̀m ndzəə́ e si wo.

³⁰Ŋgwàʼ ye yì dzəə́ wìy a wìy, wíy a lìm fo wun. Á wíy a fìʼtì kinyo ke NYÙY TÀR e ŋgwàʼ ye yì kóʼ fo bàm.

³¹Á wíy a fìʼtì e wír ve bó á yóʼ ne dzə̀ə́ jii, NYÙY TÀR‑iì lùŋèr á ne wír və́.