Read Lamnso Nsùyrì Nyùy 25 Bible Online

Nsùyrì Nyùy 25 - Lamnso bible

Nsùyrì Nyùy 25

¹[31] Éè NYÙY TÀR, m mbaa a dzə̀ wò shilív shém shidzə̀m.

²Éè Nyùy wom, m kù tiir vifií a dzə̀ e wò wùn. Lá à yòʼ màʼày mo, é m wáa woomé. Lá à yòʼ màʼtì, áàŋgàa vibàn vémé wáa jàʼ mo.

³Lá à yòʼ màʼtì, aá shoór wír ve á dzə́, yuúri a dzə̀ wò. Ku yiì, aá shoór a dzə̀ wír ve á tsə́y kóy vèn áwune kisáŋ.

⁴Éè NYÙY TÀR, ku yèʼéy mo, é m wáa jùmrì kiwuú ké. Ku mèrìr mo, é m wáa ghan a dzə̀ e wò mbòv.

⁵Yéʼéy mo, é m fíʼ a ghan mo kinyo ké ke ru kí dzəə̀n. Kù dzə̀ wò Nyùy wo wù luŋèr mo, a m kù rə́si tiir vifií a dzə̀ e wò wùn, tiir e ŋkuùr, tiir kijàvndzə.

⁶Éè NYÙY TÀR, kú a kuumé, a sham ver, a dìn ver koŋ ye à kér fo wír vée, réŋréŋ mo wò‑oò sí yii, e kèʼ fo yàŋgùʼ.

⁷Ku làysìn vinyo vém ve bi ví ve mò‑oò jayin e mǒ vinsùm. Éè NYÙY TÀR, kuúmé mo mo koŋ yée dzəə̀n, bìʼ fo à yii yii vinyo ve juŋ vi.

⁸NYÙY TÀR dzə̀ e juŋ, yii kinyo kfə́ kidzə̀m tìítiy, yéʼey wír ve á yii vinyo ve bi ví, aá ghán e wun mbòv.

⁹Wù danèr wír ve á néŋ e wun si mo á wáa tiír kiwuú kév, a fìʼ, merìr áwune mo á wáa jùmrì kiwuú kfə́.

¹⁰Ntò se vinyò se NYÙY TÀR foon sidzə̀m si dìn koŋ ye wù koŋ wír və́, tíy wùn áwune, a kù dzə̀ wír ve á lem *mensaŋ mvə, yii mo vinyo ve wù foon ví dzəə̀n.

¹¹Éè NYÙY TÀR, bìʼ yír yé, ku làysìn ajay vémé, vinyo ve bi ve m yiìn ví kùʼ e ŋàŋ.

¹²Wìr wo wù yúnin NYÙY TÀR bèé? NYÙY TÀR kù yíi tir wun mo wù wáa tiír kiwúu kfə́.

¹³Ŋgaàŋ kù wíy a dzə e mvə̀m vikùʼùy, a wón vəə́ wíy yòv nsay.

¹⁴NYÙY TÀR koó viŋkar wùn à wír ve á ghvə́m wune, yii, aá kiiy mensaŋ mvə.

¹⁵M kù yii kiʼ a dzə̀ NYÙY TÀR ghán sidzə̀m, kù dzə̀ wun wo dzə̀ wù fə̀ə́r mo fó ŋgeʼ se sí kooy mo.

¹⁶Éè NYÙY TÀR, leéy ri mo, e shàm mendzən mem mè, m dzə̀ vèr mòʼón, aá nyavrì e mò.

¹⁷Ku rəə̀r shilív shém shí, e fə̀ə́r mo fó ŋgeʼ ye m yéné.

¹⁸Ku lèéy nyár ye m dzəə̀n shóo, à ŋgeʼ sém sí. Ku làysìn ajay vémé adzə̀m.

¹⁹Yén mo aŋgàa vibàn vémé kùʼùn, aá leey mo mo dzə̀ á koò, e kfə̀r kfə́rín.

²⁰Ku kìŋsìn dzəʼə̀m yémé, e bòyìr mo, lá à yòʼ màʼày mo, é m wáa woomé, bìʼ fo m lir a dzə̀ é wò sar vàv.

²¹M leey a dzə̀ wò NYÙY TÀR, ku kìŋsìn mo. Kìŋsìn mo wo m tíy a dzə̀ é suuyrú, kwaʼtì vinyo, a dzə̀ vee tìítiy.

²²Éè Nyùy, ku sə̀ wír veé Israyi. Sə́ ver fó ŋgeʼ se á yén si sidzə̀m.