Read Lamnso Nsùyrì Nyùy 26 Bible Online

Nsùyrì Nyùy 26 - Lamnso bible

Nsùyrì Nyùy 26

¹[32] Éè NYÙY TÀR, dìn ji m dzə̀ là jay. Dzəʼə̀m yémé dzə̀ là shilóm, a m tìír ne vifií a dzə̀ e wò wùn. Bó m yòʼ yíi lèrìr, e gbù.

²NYÙY TÀR, kàʼày mo, e sàyrì mo, sàyrì shilív shém shí wùn à vifií vém ví.

³Koŋ ye à yii koŋ wír vée yimrì mo ghán sidzə̀m a m ghán a dzə̀ mo kinyo ké ke ru kí dzəə̀n.

⁴Bó m yòʼ yii tatí vé kimboʼtìi, a bó m yòʼ yii suúsin vèr aàbìnbìnteʼnsə́mé.

⁵M ban ŋgoo wìr ve bií, a bó m yòʼ yii táti wír ve á méŋ wò.

⁶Bó m yòʼ yii wáy wó yém é kinyò ke bi kí. NYÙY TÀR, m kù yii rə́si a dzə̀ e wò lav,

⁷kaári e ghaa kiy cù, yov luŋ, beerì wò, fiʼtì viŋgaʼnìn ve vinyò ve à yii vidzə̀m.

⁸NYÙY TÀR, m koŋ lav yè ye à dzə́ sho, kirə́ʼ ke wíri yén vikuʼùy vé fo.

⁹Lá à yòʼ lòvtí e mò mo à yii lóvti aŋgàa vinyò ve bi ví. Lá à yòʼ yiì, é m kpú moo vé kinjuyrìwìri,

¹⁰wír ve á ŋeʼrì gheéy, wáy wó e vinyò ve bi ví, kù ramsì a dzə̀ kiwó, sə́ kòyàr.

¹¹Yii bèy, m dzə̀ kém, a dzəʼə̀m yémé dzə̀ là shilóm. Ku bòyìr mo fó mvə̀m ŋgeʼ, e shàm mendzən mem mè.

¹²Rúrú, m kù tíy a dzə̀ é leŋ, a m yíi a sùyrì NYÙY TÀR é mvə̀m kintatì ke wìr və́, a koʼór yír rə́.