Read Lamnso Nsùyrì Nyùy 27 Bible Online

Nsùyrì Nyùy 27 - Lamnso bible

Nsùyrì Nyùy 27

¹[33] NYÙY TÀR dzə̀ kikaʼày kém, a luŋèr wun mo. A dzə̀ m wàa fàn la? NYÙY TÀR dzə̀ kóy wóm wo tavíné. A dzə̀ m kfə̀n a fàn ka?

²Wír ve bií lóo ghiʼ mo, lóo tàʼ ji á saʼti mo, e yùyrí, bo á kù yíi bàyrìn, e gbù. Aŋgàa vibàn vém adzə̀me ku gbù, à wìr dzə̀m wo wù kinèn kinyo kém.

³A mànjòŋ rə̀r fə̀m gìŋ mo, e tàr, la m yòʼ a fàn kifá. A rə́r sí fə̀m kiʼ mo, bo m kù yíi a tiír vifií a dzə̀ e Nyùy wùn.

⁴M kù lón a dzə̀ kinyo kimòʼón fo NYÙY TÀR, a dzə̀ kíwun ke m diyì. M koŋ ji m kú a rəsí a e NYÙY TǍR lav, e dù, e meé mo m wíy kpu, a leéy vijuŋ ve NYÙY TÀR, a yu ntir si fo wun shuù.

⁵Wù yíi lìtì, e kìŋsìn mo é ghan sé ŋgeʼ. Wù yíi lìtì mo e wun lav, é m wáa dzə là kinyo ké a fàn. Wù yíi tiír mo é kitu ke kirùmèn fo bó yòʼ dzə̀ wìr ghìʼ mo.

⁶Á bèy, m yíi a tiy aàŋgàa vibàn vémé kitu, a vé‑eè gìŋ ne mo, e tàr, a m yíi a seerí nyám si, a cù NYÙY TÀR, a ndzəʼ wun e wun lav cù. M yíi a yòv luŋ si, a sùyrì NYÙY TÀR shó, a burí wun.

⁷Éè NYÙY TÀR, ku yù jí yem mo m tóŋ e wò. Shám mendzən mem mè, e yù tóŋ yémé.

⁸Shilív shém shí sùúy ne e mò ji m wáa beè a dzə̀ wò. A kù dzə̀ mo m yíi a beè wò NYÙY TÀR.

⁹Lá à yòʼ bìn ndzə̀m e mò. Lá à yòʼ shwìíy kilòŋ wòsò. Lá à yòʼ siìr ŋgaà wò lìm e bàm. Kù‑uù sì wò ŋgaà sə wom. Éè Nyùy, wò wo à luŋèr mo. Lá à yòʼ ŋwày mo. Lá à yòʼ màʼày mo.

¹⁰Rúrú, a tàr wor wùn yè wor fə̀m màʼày mo, bo NYÙY TÀR kù yíi a leéy fo mò.

¹¹Éè NYÙY TÀR, yéʼéy mo, é m wáa ghan e wò mbòv, a dànèr mo é dzəə ye yì dzəə̀n é leŋ, bìʼ fo aŋgaà vém vibàné dzəə̀n anín.

¹²Lá à yòʼ wày mo e wír ve á kinèn kinyo kémé wo. Wír ve á tíy vinjen ve kisaŋe ŋàʼáy ne e mǒ wùn. Á kù bá ntaŋ a dzə̀ wo kinjuyrìwìr.

¹³Yii bèy, m biìmé feyì ji m kù dzəə́ wìy a beʼrí e nsay fèn, a yu vijuŋ mo NYÙY TÀR géʼ e mò.

¹⁴Éè wan ŋkfə wìr, ku tìír rì vifií ví a dzə̀ e NYÙY TǍR wùn. Tiím kitávín, e kùr shilív shí. Eènó, ku tìír vifií ví a dzə̀ e NYÙY TǍR wùn.