Read Lamnso Nsùyrì Nyùy 29 Bible Online

Nsùyrì Nyùy 29 - Lamnso bible

Nsùyrì Nyùy 29

¹Ven vee anyùy, vèn kwá NYÙY TÀR, vèn kwá kwaán. Vèn bínsí vikuʼùy və́, à vitaáví və́ ví,

²a sùyrì yír rə́ ye ghaʼáné. Wun woo NYÙY TÀR bvə́ysin e wun mvə̀m ran, vèn gbù é si wo, e làʼ kitú e nsay.

³NYÙY TÀR dzə̀ kfə́, a jì rə súŋnin e kitu ke ndzəv. Nyùy woo Ŋgaà Vitaàví wámkir moo kishèv, kiléŋléŋ kfə́ kí dunìn e kitu ke rìbà ndzə̀v.

⁴Jì NYÙY TÀR kér vitaáví. Dzə̀ jí Fòn wo wiy.

⁵Jì NYÙY TÀR béʼti vicí ve tavkín ví, béʼti vicí vé *sidar veé Lebanon.

⁶NYÙY TÀR yii, aàgwan veé Lebanone líynin moo wan nàʼ, yii, a Gwan Hermon shúrkir moo wan nyar.

⁷Jì NYÙY TÀR ŋwaŋ e njà kishèv.

⁸Jì NYÙY TÀR səʼsì wóʼ. NYÙY TÀR səʼsì wóʼ yeé Kadesh.

⁹Jì NYÙY TÀR kar vicí vé *terebint,[35] sooy vav si, a wìr dzə̀m woó lav cù kwá jii, buríi wáa dzə fo Nyùy.

¹⁰Kù màʼ NYÙY TÀR kàvàʼ e kitu ke mbàʼ.[36] Kù sáʼ NYÙY TÀR vifon ghán sidzə̀m, a bó ví yòʼ wíy mày.

¹¹Kù távir NYÙY TÀR wír və́. Kù səəvì NYÙY TÀR wír və́ e nyaáŋ.