Read Lamnso Nsùyrì Nyùy 30 Bible Online

Nsùyrì Nyùy 30 - Lamnso bible

Nsùyrì Nyùy 30

¹[37] Áà NYÙY TÀR, m yíi a koʼór yír yé. Wò‑oò nàn mo fó nsay, e làa yòʼ màʼtì ji aŋgaà vém vibàné wáa sheʼ mo.

²NYÙY TÀR, Nyùy wom, mò‑oò tòŋ e wò, à fèr mo, m bónén.

³Áà NYÙY TÀR, à tìn ne mo fó kpu, m kóʼór. Mò‑oò ghàr ne sə́r sày, à lùŋèr mo fo m sə́y áàŋkfəə́ wòŋ.

⁴Ven ve á ghvə́m NYÙY TÀR, vèn wáa yòv, a burí wun, a koʼór yír rə́ ye ranéné.

⁵Dòʼshwíiy və kù yii dzə́ shintàm shishàr, a wù kù shám wíri shamén là yar. A m fə̀m sə́ʼər mensíy vitsə́ʼə́, bo m kù bvəə́shi a sheʼrí kijàvndzə.

⁶Mò‑oò dzə́, a vinyo vém ví‑iì ghán kijuŋ. Mò‑oò dzəv nsaŋ jii, «Bó yòʼ dzə̀ kinyo ki wìy sə̀ʼ mo.»

⁷Éè NYÙY TÀR, bìʼ yii yé ye réŋé, à tùúy ne mo, m táv moo kirùmèn. Wò‑oò lìr fo mǒ si, m wáa fàn.

⁸NYÙY TÀR, mò‑oò tòŋ a dzə̀ e wò. Mò‑oò lón wò ji à ku shàm á mo.

⁹Mò‑oò gháy jii, «A m kpù, bo séʼ dzə̀ ka e wò? Du yém yee aŋkfəə́ wòŋe wíy fo séʼ a dzə̀ ka? A dzə̀ ŋkfəsày wàa burí wò à? A dzə̀ wù wàa fìʼtì koŋ ye à koŋ wír vé, e dù, e jòʼsì a?»

¹⁰Mò‑oò mbaa wò jii, «NYÙY TÀR, ku yù mo, e shàm mendzən mem mè.» NYÙY TÀR, kú a dzə ŋgaà sə wom.

¹¹Wò‑oò lo bìnèr mendzən mem é vijùŋ, m wáa sèv. Wò‑oò sòr mensíy fo mǒ si, e màʼ ndzə̀y sé viwìr e mǒ wùn,

¹²m wáa sheʼrí, a burí wò, e làa yòʼ a dzə kisə́sə. Éè NYÙY TÀR, Nyùy wom, m kù yíi a yòv, a beèrì wò, e dù, e jòʼsì.