Read Lamnso Nsùyrì Nyùy 31 Bible Online

Nsùyrì Nyùy 31 - Lamnso bible

Nsùyrì Nyùy 31

¹[38] Éè NYÙY TÀR, m lir a dzə̀ e wò wùn. Lá à yòʼ màʼày mo, é m wáa woomé. Ku bòyìr mo bìʼ yii yé ye réŋé.

²Yú tóŋ yémé, e sə̀ mo cér. Kú a dzə kirùmèn kém ké nsàm. Kú a dzə kirə́ʼ kém ke tavín kí, áà kiŋsin mo, é m luŋ.

³Rúrú, dzə̀ wò kirə́ʼ kém ke tavín kí, aà dzə̀ kikiŋ kém. Kú a dànèr mo, a shìy mo, bìʼ fò Nyùy wom kù dzəə̀n wò.

⁴Á nyàʼtí ne, e tàm lálán, a shìy mo shó. Ku tèér mo fó fo. Dzə̀ wò kikiŋ kém.

⁵NYÙY TÀR, Nyùy woo ŋgaà suuyrú, m sí wáy kiyoy kém e wò kiwo, a m kì ji à wíy bòyìr mo.

⁶M ban wír ve á ghvə́m anyùy kisaŋe, a m wáy kém shilív a dzə̀ e wò wùn.

⁷M kù yíi a yu vijuŋ, a sheʼrí bìʼ koŋ ye à koŋ wír vé. À yèn ne mendzən mem, e kìíy ŋgeʼ sém sidzə̀m.

⁸À yoʼ wày mo e ŋgaà vibǎn kiwo, aà sə̀ ne mo, m bóy fó njoy.

⁹Éè NYÙY TÀR, ku shàm mendzən mem mè, ku shàm mo, m dzə̀ é mvə̀m ŋgeʼ. Nyári ghàʼ ne, m díy, síi kóʼkír, a m mày ne moo sí rùʼ, à fó kiyòy, à fó wùn.

¹⁰Dzəʼə̀m yémé kù sì yé mendzə̀ne, a viyá vém ve ví bér vi kù sì vé shwem vi. Ŋgeʼ si rèŋèr ne vitaáví fo mǒ wùn, m kfə́n ji là kighvə́r.

¹¹M kfə̀n ne ji kifá ke nshéʼmé ki fo wír ve á ban moó, e kfə̀n ji kimbemèr fo aŋgàa shweesí vémé. Wír ve á kiìn moó kù sí leey mo, fan fànèn, wìr yén mo é dzəə, wù shòʼ a dzə̀ kileʼ.

¹²Á làysìn ne mo mo á làysìn ŋkfə sày, a m sì ji ŋkòyláŋ.

¹³M yú mo aneéníne səmnìnè, mo á kár menàŋ e mǒ bàm. M yú mo á wóŋ ji á laar dzəʼə̀m yém, a melaà mè kù sì mbìv sidzə̀m.

¹⁴Yii bèy NYÙY TÀR, m kù tiir vifií a dzə̀ e wò wùn, suuy ji Nyùy wom kù dzə̀ wò.

¹⁵Dzəʼə̀m yémé dzə̀ a dzə̀ e wò kiwo. Bòyìr mo fo aŋgaà vém vibàné wo. Sə́ mo fo wír ve á ron wuú yémé.

¹⁶Dìn shilív shé she juŋ shi e ŋgaà lìm wò, e sə̀ mo bìʼ koŋ ye à koŋ wír vé.

¹⁷Éè NYÙY TÀR, lá à yòʼ màʼày mo, é m wáa woomé, bìʼ fo m tóŋ a dzə̀ e wò. Ku yiì, é woómé wír ve á ŋwáy wò. Sə́tí shuu wóví, aá du áàŋkfəə́ wòŋ kisə́sə.

¹⁸Sə́tí shúu vé kimboʼtìi, aá kfə́n ji vindzə̀mer, shúu wìr ve á jaʼ wír ve á yúnin wò, shúu wìr ve á kóʼor wún, taʼ wír vé ntéŋ.

¹⁹À nə́ʼsin wír ve á ghvə́m wò e vijuŋ vi, nə́ʼsin áwune e vijuŋ ve ghaʼtín ví, fó vijuŋ e wír ve á lir e wò wùné adzə̀m, a wìr dzə̀m yéné, səəmè.

²⁰À litì áwune e wò ghaŋ, bìʼ menàŋ me wìr msòŋ. À kér áwune kijuŋ e wò sar kikfəvsì, bìʼ liy se aŋgaà vév vibàn.

²¹Búríi dzə̀ fo NYÙY TÀR. Mò‑oò dzə́ e ŋkàlaʼ, a rə́r sí gím ne e tàr, wù kú a geʼ e mò, a dìn koŋ rə́ ye ghaʼtíné.

²²Mò‑oò búʼ shirəə́, suuy jii, «Á jùm ne mo, m láy fo wò si.» Yii bèy, wò‑oò lo yù tóŋ yém, tóŋ ye mò‑oò tóŋ ji à sə́ mo.

²³Ven ve á yúnin NYÙY TÀR, vèn kú a kòŋ wun. NYÙY TÀR kiŋsìn wír ve á tíy e wun wùn, a ké wìr ve á kóʼor wún, wù maʼ ŋgeʼ ye biibí aáwuné kitu.

²⁴Ven ve vèn tiir NYÙY TÀR fó mbìy, vèn kú a kur a dzə̀ tím, a way ŋàŋ.