Read Lamnso Nsùyrì Nyùy 32 Bible Online

Nsùyrì Nyùy 32 - Lamnso bible

Nsùyrì Nyùy 32

¹Bòŋ ké wìr wo Nyùy laysìn ajay və́, téʼ vinyo və́ ve bi ví teʼén.

²Bòŋ ké wìr wo bó Nyùy yòʼ kív njò se wù jáyí, wír, a bó wù yòʼ litì kinyo e shiliv.

³Mò‑oò dzə́ kém kisə́sə, dzə́, e làa yòʼ tuuné ajay vém. Kù nèn yúm yumén, mayì, yúm, a dzə̀ diy yee kishiíy kidzə̀m.

⁴Wò‑oò ndzə́n mo é ŋàŋ, ndzə́n e shùy, ndzə́n vitsə́ʼə́. Vitaáví ví máy fo mǒ wùn, may màyìn mo vibuushì ví yòvrí e lùm.

⁵M nèn tuùné ajay vém e wò, e làa yòʼ lìtì kinyo kém ke bi kí. Mò‑oò sùúy jii, «Mo‑óò tuúné ajay vém e NYÙY TÀR.» Á bèy, NYÙY TÀR, à nèn làysìn ajay vém, e sù njò yem.

⁶Bìʼ bey, wìr dzə̀m kú a bùnrì wò e ghan sé ŋgeʼ, wír ve á tíy e wò wùné kú a toŋ e wò. Ŋgeʼ si fə́m lóo mèʼèm moo ndzə́v, bo bó yòʼ dzə̀ sí mèʼ ŋgaàŋ.

⁷À dzə̀ kikiŋ kém, aà jaamè mo fó ŋgeʼ. À kiŋsìn mo mbìv sidzə̀m, a m boy fo ŋgeʼ, yov nsiì.

⁸NYÙY TÀR suuy jii, «M yíi dìn wò dzə́ə ye à wáa ghan sho. M yíi a yeʼéy wò, a tir wò mo à wáa yiì. M yíi a leéy wò fo à tín kiwuú.

⁹Lá à yòʼ a yuŋsí moo nyamŋkoʼ, a yuŋsí moo kimbèʼbìy ké nyàmŋkoʼ, nyám, aá kù danèr a dzə̀ e sháŋ, kan kànèn, é bo yì yúnín, a dù.»

¹⁰Nyár wìr wo wù méŋ Nyùyi kù yii dzə́ e nín, a koŋ ye NYÙY TÀR koŋ wír vəə́ kù yii kiŋsìn wír, kiŋsìn wír ve á wáy shilív e wun wùn.

¹¹Ven ve á yúnin NYÙY TÀR, vèn wáa sheʼrí, a sàvnìn. Ven ve melív men mè dzəə̀n tìítiy, vèn wáa kwa, a sheʼrí wun.