Read Lamnso Nsùyrì Nyùy 33 Bible Online

Nsùyrì Nyùy 33 - Lamnso bible

Nsùyrì Nyùy 33

¹Ven ve á yúnin NYÙY TÀR, vèn wáa ndzəʼ, a sheʼrí wun. Wír Nyùy adzə̀me wáa burí wun.

²Vèn kú a burí wun e lúŋé, a yòv, a kùm lúŋ nshìí, yee ŋgay e ghvə̀m.

³Vèn wáa sùyrì wun e luŋ wo fíyi, a bàytì lúŋ, a yòv kitávín.

⁴Jí se NYÙY TÀR sí dzə̀ suuyrú, a lim rə́ e dzə̀me dzə̀ là kiloʼ.

⁵NYÙY TÀR koŋ a dzə̀ kinyo ke réŋ kí, shéʼri vinyo veé nsànloŋ sheʼrín. Wù kù din mo wù koŋ wír və́, a wìr dzə̀m yén virə́ʼ vidzə̀m.

⁶Nyùy‑iì sùŋnín suŋnín, yúví nèn a dzə e bómén, e yòŋ yòŋèn fó shuù, vifá veé yuv ví nèn a dzə.

⁷Wù‑uù bàʼtí rìbà ndzə̀v é kirə̀ʼ kimòʼón, e kìŋ fó, fo wù fəə́ é kwaʼ.

⁸Kitú ke nsay kidzə̀m ki wáa fàn NYÙY TÀR, é wìr dzə̀m kú a leéy wun, é shúu wáa ma.

⁹Wù‑uù súŋnin, kí nèn kù a dzə e wun jì. Wù fó sáʼ, kifá kidzə̀m ki nèn kù fəə̀sín.

¹⁰NYÙY TÀR bvəər ntaŋ wo vitúm vi bá, táʼar kwaʼtì ye áwune kérí.

¹¹Nsìysì NYÙY TÀR kù tíy fo ghán sidzə̀m, a kwaʼtì rəə́ dzə̀ fo ŋgwàʼ si sidzə̀m.

¹²Bòŋ ké wìr ve NYÙY TÀR dzəə̀n Nyùy wov, wír, ve wù tayin táyín ji və́ vee wír.

¹³NYÙY TÀR maʼ sí fo yuv, wù yèn wón wìr msòŋ adzə̀m.

¹⁴Wù maʼ sí fo kàvàʼ, kíy wír woó nsay e dzə̀m.

¹⁵Kù‑uù nàŋsín wun melív me wìr dzə̀m, a kù shwéʼ wun yii yév e dzə̀m.

¹⁶Bó yòʼ dzə̀ fòn sò rə́r bìʼ vé rər vee anín, a bó yòʼ dzə̀ ŋgaà rə̀r tàm bìʼ vitaáví və́.

¹⁷Bó yòʼ dzə̀ nyàmŋkoʼ yiì, wìr sò rə́r. Fə̀m mo yì tavin, bó yòʼ dzə̀ yì lùŋèr wun.

¹⁸Rúrú, NYÙY TÀR yii shiy wír ve á ghvə́m wun, shiy wír vé á tiir vifií é kòŋ ye wù koŋ wír və́.

¹⁹Wù boyìr áwune fó kpu, lem áwune atin e ghan sé jiŋ.

²⁰Vèr kù kiʼ kér a dzə̀ NYÙY TÀR. Dzə̀ wun ŋgaà sə wor, dzə̀ wun ŋkeè wor.

²¹Rúrú, vèr shéʼri wun, wun wo yír rəə́ dzəə̀n e ránén. Vèr kù tiir vifií a dzə̀ e wun wùn.

²²Éè NYÙY TÀR, vèr kù tiir a dzə̀ wò fo mbìy. Kú a kòŋ ver bìʼ koŋ ye à yii koŋ wír vé.