Read Lamnso Nsùyrì Nyùy 34 Bible Online

Nsùyrì Nyùy 34 - Lamnso bible

Nsùyrì Nyùy 34

¹[39] M yíi a beèrì NYÙY TÀR ghán sidzə̀m. Búrí rəə́ kú a dzə e mǒ shuù, e dù, e jòʼsì.

²M yíi a búrí NYÙY TÀR bìʼ vinyo ve wù yiìn. Vé ŋgeʼe ku yuùrí, a yu vijuŋ.

³Vèsən tátí, a wùʼsì NYÙY TÀR. Vèsən tátí, a koʼór yír rə́.

⁴Mò‑oò tòŋ e NYÙY TÀR, wù yú tóŋ yém, e bòyìr mo fo wír ve vé‑eè bémer moó.

⁵Wír ve á wáy shilív e wun wùné yú vijuŋ, bó yòʼ dzə̀ dzə̀rkìtu wìy a koo áwune.

⁶Mo woo wan ŋkfə wìr‑iì tòŋ, NYÙY TÀR yú tóŋ yém. M tóŋ, wù fəə́r mo fó ŋgeʼ se m yéné.

⁷Nshìylav NYÙY TÀR kiŋsìn wír ve á ghvə́m NYÙY TÀR. Yì kiŋsìn áwune, boyìr fo kpúu.

⁸Vèn mum, é vèn yén ji NYÙY TÀR dzə̀ á e juŋ. Bòŋ ké wìr wo wù lir e NYÙY TǍR wùn.

⁹Ven vee wír NYÙY TÀR adzə̀m, vèn wáa ghvəm wun. Wír ve á ghvə́m wune yòʼ búŋ kifá.

¹⁰Wón bvərə̀ʼə́ lo, á wàa buŋ kifá. Áwune lo, á wàa kpukír jíŋ, Wìr tiir NYÙY TÀR fó mbìy, la wù yòʼ bùŋ kifá. Wù yòʼ búŋ kifá ke juŋ kímóʼ kí gheéy.

¹¹Wòn vem, vèn wiy, e yuùrí. M yíi yeʼéy ven mo dzə̀ vèn wàa ghvəm Nyùy.

¹²Wìr wo wù taʼ ji wun wáa dzə e dzə̀ʼə̀m, a ker dzəʼə̀m ye dáa, a yu vijuŋ,

¹³ŋgaàŋ kim kiliímé kfə́ fó vinyò ve bi ví, e yàr kimboʼtì.

¹⁴Wù maʼti vinyo ve bi ví, a yiì a dzə̀ ve juŋ vi, a jùm a dzə̀ dzəʼə̀m yee nyaáŋ, e meé mo wù wíy koóy.

¹⁵NYÙY TÀR yii shiy wír ve á yúnin wun, shiy áwune, yuúri bunrì yév.

¹⁶Wù yíi kòr sí fo wír ve á yii vinyo ve bi ví, é yír yéví lay fó kitu ke nsay.

¹⁷Wír ve á yúnin Nyùyi tóŋ e wun, wù yù tóŋ yév, tóŋé, wù fə̀ə́r áwune fó mvə̀m ŋgeʼ.

¹⁸Shilív shí seem wír, NYÙY TÀR kù a dzə wùn ŋgaàŋ. Wù yii shám wír ve á dzə́ e nsòvkìtu, luŋèr áwune.

¹⁹Ŋgeʼ si kooy wír wo wù yúnin Nyùy sinín, a NYÙY TÀR fəər wun fo fo sidzə̀m.

²⁰NYÙY TÀR kiŋsìn ŋgaàŋ fo á lémér wun, a bó yòʼ dzə̀ á bèʼ kighvə́r kfə́ fə̀m kimòʼón.

²¹Lòné kù yíi koo wír ve á méŋ Nyùy, a ve á ban wír ve á yúnin Nyùyi wíy gbù nsaʼ.

²²NYÙY TÀR yii boyìr aŋgàa lìm və́, a bó yòʼ dzə̀ wír wo wù lir e wun wùn wìy gbù nsaʼ.