Read Lamnso Nsùyrì Nyùy 35 Bible Online

Nsùyrì Nyùy 35 - Lamnso bible

Nsùyrì Nyùy 35

¹[40] Éè NYÙY TÀR, ku kìnèn kinyo ke wìr ve á kinèn kinyo kémé. Ku fùnèn wír ve á funèn moó.

²Lì ŋkeè rə̀r e màʼ kikúm ké rər kí. Ku ŋàʼáy, e wìy, e tòm mo.

³Báʼtí vibvə́m ve kòŋ ví. Ghár njàm yè rə̀r é kiwo, e taàmé wír ve á jum moó shó. Ku kàʼ mo ji à yíi bòyìr a mo fo wír vìne.

⁴Màʼ wír ve á ron wuú yémé. Ku yiì, aáwune wáa woomé. Tsə́y wír ve á taʼ yuyrí moó é bàm, e tùʼùr, aá méŋ fo á dzəə̀n.

⁵Yìi, aáwune wáa dzə moo mvə́y se shwéri feerì. Ku yiì, é nshìylav yè jum áwune, aá nyéŋ nyeŋén.

⁶Ku yiì, á lóo dù, é dzəə̀ wáa lèrìr, é virə́ʼ ví wáa sən, é nshìylav yè wáa nyoòrì áwune nyóorin.

⁷Á màʼ lálán ji á koó mo shó. Á tùŋ bií ji m gbu shó, mo là njò.

⁸Yìi, é ŋgeʼ si ku sàsìn e sùm áwune. Yìi, é lálán wo á màʼàn é kilìtì ndzə́v a dzə̀ áwune. Ku yiì, aá gbu, e kìvkír e bii wo áwune tuŋen.

⁹Á bèy, é m yiì a seŋ, a sàvnìn. M yíi a sheʼrí NYÙY TÀR, wun wo wù faàsìn mo fo aŋgaà vém vibàné wo.

¹⁰M yíi a burí NYÙY TÀR, a burí feyì jii, «Rúrú, NYÙY TÀR, dzə̀ la moo wò? Dzə̀ faàsì la anjoó fo antaví wo? Yíi faàsì la anjoó, à vé kitàne fo ŋgaà nə̀ʼsì?»

¹¹Vé kimboʼtìi wiy, tiim vinjen ve kisaŋ vi. Áwune wiyì, tóy vinyo e mǒ bàm.

¹²Á siir vinyo ve juŋ ve mò‑oò yiìn aáwune a dzə̀ e ve bi ví, yii, a m tíy vèr mòʼón mendzən mendzən.

¹³Yàsí‑iì nə̀ə́ áwune, m wáa rəsí a dìy. Mò‑oò nyavrì e kitú kém kí, lem jíŋ, rə́si bunrì e kitú kí nsay.

¹⁴Mò‑oò diy feyì, diy mo wìr dìy ŋkar rə, kìn fə́r və, ghán bèn kirəə́yín, sov kitú, sov mo wìr dìy kpú yè wov.

¹⁵M gbú, áwune kaárí, a jàʼ. Á kaárí, a taamé mo taamén. Á téʼ mo, e ŋàʼáy e mǒ wùn, a sàtì mo sátin, là yar.

¹⁶Áwune kuurì mo, maʼ lám e mò máʼan, leey mo mo dzə̀ á koò, e kfə̀r kfə́rín.

¹⁷Éè NYÙY TÀR, à wíy leéy mo ben, e dù, e meé e le? Faàsì mo fo áwuné wo. Faàsì dzəʼə̀m yémé fo abvərə̀ʼ víne.

¹⁸M boyì, é m yiì a beèrì wò. M yíi a beèrì wò e kintatì ke wìr vée mvəm, a sùyrì wò súyrin e màŋgòŋ mvəm.

¹⁹Ku màʼ wír ve á ban mo kisáŋe, é la áwune yòʼ a yòv nsiì e mǒ kitu. Sə̀r wír ve á ban mo là jayi. Lá à yòʼ biìmé, aá wáa sheʼ ŋgeʼ sém.

²⁰Kisúŋnìn kév kí yòʼ din nyaáŋ. Á kù cì kwán e wír ve á dzə́ ji nyaáŋé bàm. Áwune kù kwaʼtì a dzə̀ jí se kimboʼtì.

²¹Áwune ŋàŋ shuu, e lèm e rə́, a taamé mo, taáme, suuy jii, «Eèhə́ə̀, vèr koò ne wò e kileèmè.»

²²Éè NYÙY TÀR, à yèn ne, lá à yòʼ gòʼ kisə́sə. Éè NYÙY TÀR, lá à yòʼ a tiy kwaʼda fo mò.

²³Éè NYÙY TÀR, túm é yuv, e bìn nsaʼ yem, e fò e mò. Éè Nyùy wom, bìn ghay wómé, é wú tiím fó.

²⁴Éè NYÙY TÀR, éè Nyùy wom, mo yii yée dzəə̀n là jay, ku dìn ji m dzə̀ là njò. Ku yiì, é la áwune yòʼ a yòv nsiì e mǒ kitu.

²⁵Ku yiì, é la áwune yòʼ a binsí jii, «Eèhə́ə̀, kí ghèén ne mo vèr‑iì taʼà,» é la áwune yòʼ sùúy jii, «Vèr sùm ne wun.»

²⁶Ku màʼ wír ve á shéʼri ŋgeʼ sémé, aá wáa woomé, a tùʼtìn, a meŋ fo á dzəə̀n. Ku sùm wír ve á sí taá e mǒ kituu. Sùm áwune e woómé si wùn à nsòvkìtu.

²⁷Ké wìr ve á tom mo ji m dzə̀ là njò, ku yiì, aá wìy a sheʼrí, a sàvnìn, a binsí ji NYÙY TÀR dzə̀ rú e gháʼtín. Shií və kù dzə̀ kfə́ ji ŋgaà lìm və só.

²⁸Á bèy, é m wáa fìʼtì mo à yii tínen kinyo ké là kiŋkùvrì, a fìʼtì, a koʼór yír yé ghán sidzə̀m.