Read Lamnso Nsùyrì Nyùy 36 Bible Online

Nsùyrì Nyùy 36 - Lamnso bible

Nsùyrì Nyùy 36

¹[41] Wìr wo wù méŋ Nyùy sí kér a dzə̀ kwaʼtì ye bií e wun shiliv,[42] a bó wù yòʼ dzəə́ yén Nyùy, a wù rún sí rə́.

²Wù sumrì wún, ŋáʼri jii, Nyùy yòʼ yíi kiíy vinyo və́ ve bi ví. Wù yòʼ yíi kiíy, e bóo way wun e ŋgeʼ.

³Wù mvəʼ shuu, kù fəə̀ kinyo ke bi kí, lóo suŋnín, kù a fəə kimboʼtì, a bó wù yòʼ dzəə́ yii yii ye juŋe moo fií.

⁴Wù lóo neŋ e kikun, wù wàa baʼtí a dzə̀ kighèʼ. Wù kù sí taʼ a dzə̀ dzə́ə sé kisaŋ si. Jòkìnyàʼ, bó wù yòʼ bin ndzə̀m é yiì ye bií.

⁵NYÙY TÀR, koŋ ye à koŋ wír vée dzə̀ là mfìʼ, aà kù tíy vèn áwune e dù, e jòʼsì.

⁶Yii yé ye ruú tíy fo moo virùmèn ve ghaʼtín ví. Wáy ye à wáy kinyóo dzə̀ e shoón moo rìbà ndzə̀v. Kù leey wò fo wìr msòŋ wùn à nyám si.

⁷Éè NYÙY TÀR, koŋ ye à kér fo wír vée dzə̀ fùʼ woo là mfìʼ. Wón wìr msòŋé kù lir a dzə̀ e wò sar vàv.

⁸Á kù yí vifá ve à nə́ʼsin áwune shó nyanyày, a vifá vé ve juŋ vi léŋ moo ndzə́v, a wíri tú, nó.

⁹Dzəʼə̀m wìr dzə̀me kù lo a dzə̀ fo wò. Rán yée yii, a vèr yén sa rán e věr dzə̀ʼə̀m.

¹⁰Ku dìn koŋ yée e wìr dzə̀m wo wù kiìn wò, a geʼsín e wír ve melív mev mè dzəə̀n tìítiyi.

¹¹Lá à yòʼ màʼtì, é wír ve á ŋaʼàa nyeŋri mo, kìn, é ve á ŋwáy wòo yii, é m léʼ fo wò bàm.

¹²Wír ve á méŋ Nyùyi víne mo á gbùkìn ne, a neŋ. Á néŋé, a dzəə̀ yée lò e yuv yòʼ kfən dzə̀.