Read Lamnso Nsùyrì Nyùy 37 Bible Online

Nsùyrì Nyùy 37 - Lamnso bible

Nsùyrì Nyùy 37

¹[43] Lá à yòʼ a yu ntéŋ bìʼ wír ve á méŋ Nyùy. Lá à yòʼ a siimé vijuŋ ve wìr ve á buʼtì vinyo.

²Áwune kù yíi sàsìn, e yovrí moo viŋgà. Á yíi soóy moo vikwiíy ve shoòŋ vi.

³Wáy shilív shí e NYÙY TǍR wùn, a yiì vinyo ve ru ví. À lóo yiì, áà nèn a dzə e nsay kijuŋ, là kinyo ké a fàn.

⁴Kú a sheʼrí ké kí a dzə̀ NYÙY TÀR, é wù yii yiì kinyo ke shilív shé shi diyì.

⁵Fó dzəʼə̀m yée a dzə̀ e NYÙY TÀR. Wáy shilív shí e wun wùn, é wù sə́ wò.

⁶Wù yíi dìn kiránén ji bó à yòʼ kì á fo kinyò. Wìr dzə̀m kù yíi yen ji á tòy á wò e kinyò kisáŋ.

⁷Dzə̀ʼə̀m ji nyaáŋ e NYÙY TǍR si, a yuurí a dzə̀ wun. Lá à yòʼ a yu ntéŋ bìʼ wír wo vinyo və́ ví du kijuŋ, wír wo wù rə́si bá menàŋ, a vinyo və́ ví gháné.

⁸Fə́tí wóo fó dòʼshwiíy, e bìn ndzə̀m shó. Kii wò, lá à yòʼ a yu nyár wìr ve bií. Nyári danèr wír, wáy a dzə̀ é kinyò ke bi kí.

⁹Á wíy laàr wír ve á méŋ NYÙY TÀR fó wòŋ láarin. Yii bèy, wír ve á tiir vifií e NYÙY TǍR wùné kù wíy a dzə e nsay. Á wíy a dzə e nsay ye Nyùy foon aáwune.

¹⁰Bèr shishàr, áà yén, a wír ve á méŋ NYÙY TÀRí yòʼ dzə̀ə́. Aà fə̀m taʼ fo fèé, bó yòʼ dzə̀ féyì à yèn.

¹¹Yii bèy, wír ve á bórkir e Nyùy sii kù wíy a dzə e nsay. Áwune kù wíy a dzə e nsay, a yu vijuŋ ve vikùʼùy nyanyày.

¹²Wír ve á méŋ Nyùyi ron wuú wìr ve á yúnin wun. Áwune ŋéyti sóŋ kibiíbí, kiʼ wír ve á yúnin Nyùy sho.

¹³Yii bèy, NYÙY TÀR leey wír ve á méŋ wun, shéʼ sheʼén. Wù kì ji kishiíy kí wiyì ke wun wíy màʼ ŋgeʼ aáwuné kitu.

¹⁴Wír ve á méŋ Nyùyi shòʼ ne nyùy sév. Áwune bàʼtí ne vinte vév. Á taʼ fóo laàr aŋgàa kitàn, e laàr vé kighiyi. Á taʼ fóo seerí wír ve á yii réŋ adzə̀m.

¹⁵Yii bèy, Nyùy wíy lì nyùy sév. Wù wíy lì, e sòvtì a dzə̀ áwune shó, sovtì áwune, é wù béʼtí vinte vév.

¹⁶Bòŋ shishàr she wìr wo wù yúnin Nyùy kérí. Kí bòŋ, e shaà kikùʼ ke wìr wo wù méŋ Nyùy.

¹⁷NYÙY TÀR wíy laàr vitaáví vé wìr ve á méŋ wun. Yii bèy, ké wìr ve á yúnin wun, wù kù yíi tomrí tomrín.

¹⁸NYÙY TÀR yii leey fo wír ve á dzəə̀n là nseme. Woŋ wo dzəə̀n vitsə́ʼ véví kù wíy a dzə ji wóv. Wú kù wíy a dzə ji wóv, e dù, e jòʼsì.

¹⁹Ghán sí fə̀m bírí, la áwune yòʼ a dzə e kighiy. Jìŋ koó, áwune kù a ker viyíkìr nyanyày.

²⁰Yii bèy, wír ve á méŋ Nyùyi wíy kpu, e lày làyìn. Áwune dzə̀ moo vibuushì veé kwaʼ ve ví tó sí. Ví lo, ví nèn lày moo kindzə́ʼ ke kí ŋeemen, e lày.

²¹Wìr wo wù méŋ Nyùy kù dzə́, foo kifá fóon. Wù foo kifá, a bó yòʼ dzə̀ wù siìr. Wìr wo wù yúnin Nyùy ján kfə́ e vifá vi janén. Wù ján e vifá vi janén, kér wó rə́ tèéter.

²²Rúrú, wóŋe kù wíy a dzə wó wìr wo NYÙY TÀR səə̀vìn, a wù kù wíy laàr wír ve wù shovin ne láarin fó wòŋ.

²³Kù yii danèr NYÙY TÀR wír wo wù yúnin wun. Wù danèr ŋgaàŋ mo wù wáa tiír kiwuú kfə́, shéʼri wun mo wù ghán e wun mbòv.

²⁴Ŋgaàŋ fə́m bayrìnè, é la wù yòʼ gbù. NYÙY TÀR ghàr ne wun e kiwó kfə́ kí.

²⁵Kèʼ fo meterí, e meé lèn wo m dzə̀nèn ne, m yòʼ‑oò yiì ne yèn, a Nyùy máʼáy wír ve á yúnin wun. M yòʼ‑oò ghàn ne yèn, a wón véví lón vifá ve yi.

²⁶Wír ve á yii réŋé kér wó yév tèéter. Á kù foor wíri vifá ghán sidzə̀m. Wón véví dzə̀ kisəəvì e wírí mvəm.

²⁷Léʼ fó bǎm kinyò ke bi kí. Léʼ, a yiì a dzə̀ ke juŋ ki, áà nèn wìy shaàrì e wòŋ.

²⁸NYÙY TÀR yii koŋ kinyo kee là kiloʼ. Wù yòʼ wíy màʼày wír ve á tíy e wun kinyò. Wù kù wíy a kìŋsìn áwune kíŋsin, e dù, e jòʼsì. Ké wìr ve á méŋ wun, á wíy laàr laàrìn fó wòŋ.

²⁹Wòŋe kù wíy a dzə wó wìr ve á yúnin Nyùy. Áwune kù wíy a dzə fo, e wìy dù mày.

³⁰Wír ve á yúnin Nyùyi yii yoŋ kinyo a dzə̀ ke kí kér vifií. Áwune kù yii yoŋ kinyo a dzə̀ ke kí dzəə̀n là kiloʼ.

³¹Ntir se Nyùy wov sí dzə̀ aáwuné meliv, aá kù yii, a dzə̀ mo sí suuyì.

³²Wír ve á méŋ Nyùyi nyáʼti, shwéʼ ve á yúnin Nyùy. Á kù taʼ dzə́ə yée yuyrí wír Nyùy sho yuyrín.

³³Bó yòʼ dzə̀ NYÙY TÀR màʼày wír ve á yúnin wun. Bó yòʼ dzə̀ wù màʼtì áwune aàŋgàa vibàn véví wo, a bó yòʼ dzə̀ wù biìmé ji á gov áwune, é nsaʼ koó.

³⁴Kú a dzə, a yuurí NYÙY TÀR, a ghan a dzə̀ e wun mbòv. Wù yíi koʼór wò kóʼórín, áà wáa dzə e wòŋ. À kù wíy a dzə e wòŋ wo wù‑uù kàʼàn ven shó, aà wíy yen mo wù laar wír ve á méŋ wun fo wòŋ.

³⁵Mò‑oò yèn mo wìr wo wù méŋ Nyùy kóʼninè, tíy tiyín e wìr dzə̀m kitu moo kicí kee *sidar keé Lebanon.

³⁶E bǎm shintàm, m wáa shaà, shaa, a bó wù yòʼ dzə̀ə́ fo. M wáa tàʼ, e làa yòʼ yen.

³⁷Wáy síi e wìr woo là nsem wùn. Wáy e wìr wo wù yii vinyo və́ tìítiy wùn. Wìr wo wù koŋ nyaáŋ dzə̀ wo wù wíy a ker rám.

³⁸Yii bèy, Nyùy wíy laàr wír ve á shóʼor nsər sə́. Wù wíy tatí áwune adzə̀m, e laàr. Wù wíy laàr rám wìr ve á méŋ wun, laarì, é rám yéví lay fó wòŋ ŋkuuŋkùŋ.

³⁹Ké wìr ve á yúnin NYÙY TÀR, wù kù luŋèr áwune lúŋerin. Wúnwun dzə̀ kikfə́vsì kév é ghan sé ŋgeʼ.

⁴⁰Wù kù yíi sə áwune, e fəə́r fo ŋgeʼ. Wù yíi fəə́r áwune fo wír ve á méŋ wuné wo. Wù boyìr áwune, bìʼ fo á tiir a dzə̀ wun fo mbìy.