Read Lamnso Nsùyrì Nyùy 38 Bible Online

Nsùyrì Nyùy 38 - Lamnso bible

Nsùyrì Nyùy 38

¹[44] Éè NYÙY TÀR, lá à yòʼ sàʼ mo e wò mvə̀m dòʼshwiíy. Lá à yòʼ màʼ ŋgeʼ e mǒ kitu, aà shwiiy kilòŋ.

²Mvən sé si tòkír ne e mǒ wùn. Kiwó ké ki tsə́y mo, e bàʼ fo nsay.

³Wúné yòʼ dzə̀ mo shó, a dzə̀ bìʼ dòʼshwiiy wò, a kighvə́r kém kí yòʼ dzəə́ tár kímóʼ kí bìʼ jay wom.

⁴Vinyo vém ve bi ví rùn ne rúnén e mǒ kitu. Ví dzər moo kibeʼèy, gháʼ mo.

⁵Viváv vém ví sí jeʼèm, rəmè, a kù dzə̀ bìʼ shilív shém she wuyín shí.

⁶Nyári kìvtí ne mo kívtín, a m ghán, tóŋ mo m diy a dzə̀ kpú, e kèʼ fo kijàvndzə, e dù, e meé e ŋkuùr.

⁷Kinjàʼ ki yaʼ mo é ŋàŋ, a wúné shwí mo shwiín, a mbìv wùn yìmòʼ yòʼ tár yìmòʼ.

⁸Wúné mày ne mo máyin, a m koó e bvə́ʼə́yín. M kù sí kónsi kònsín bìʼ ŋgeʼ se sí sùmèn ne mo.

⁹Éè NYÙY TÀR, m yár jíŋ ji à yii, é m bónén. Nyár yémé yòʼ dzə̀ é kilìtì fo wò.

¹⁰Shilív shí sí búʼ mo búʼún, a vitaáví vém ví sí mayì, a m sí yén virə́ʼ ji làʼrì làʼrì.

¹¹Ŋkar sém sí sí yór nyár yém yorín, aàŋgàa ŋgoo vémé adzə̀m. Afə́r vémé màʼày ne mo, a leéy mo leéyín fó meŋkìŋ.

¹²Wír ve á taʼ, e laàr dzəʼə̀m yémé kóʼor vitám ji m li shó, a wír ve á taʼ ji m lémé bá ntaŋ ji á laar mo. Á kù kwaʼtì ghán sidzə̀m a dzə̀ móo yuyrí mo.

¹³Yii bèy, a m yii kém moo nsəərì, a bó yòʼ dzə̀ m yù kinyo kév. M kù yii moo kindzə̀mer, a bó yòʼ dzə̀ m sùúy kinyo.

¹⁴Rúrú, m sì nsəərì, a bó yòʼ dzə̀ m yù kinyo. Nsəərì, wo bó yòʼ dzə̀ wù tùnér kitú kfə́.

¹⁵Éè NYÙY TÀR, m kù yuúri a dzə̀ wò. Nyùy wom, kù yíi bìnèr wò aŋgaà vém vibàn.

¹⁶M lón jii, «Lá à yòʼ biìmé ji áwune wáa sheʼ ŋgeʼ sém. Lá à yòʼ biìmé ji á wáa dzə̀v nsaŋ ji dzəʼə̀m yémé rə̀vkír ne.»

¹⁷Ŋgeʼ si sí gháʼ mo ghaʼán, a wúné kù nyár mo nyárín ghán sidzə̀m.

¹⁸Nyaa mò, mo‑óò tuúné vinyo vém ve bi ví. Ví yii, a shilív shém shí búʼú.

¹⁹Yii bèy, aŋgaà vém vibàné kú a dzə sho atávkín. Aníne dzə̀ ve á ban mo bánen là jay.

²⁰Áwune siir kinyo ke juŋ ke m yii, e ke bi kí. Á kù ban mo, bìʼ fo m jumrì kinyo a dzə̀ ke ru kí.

²¹Éè NYÙY TÀR, lá à yòʼ làysìn mo. Éè Nyùy wom, lá à yòʼ a dzə ntàmda fo mò.

²²Éè NYÙY TÀR, dzə̀ wò wo à luŋèr mo. Ku sə̀ mo cér.