Read Lamnso Nsùyrì Nyùy 39 Bible Online

Nsùyrì Nyùy 39 - Lamnso bible

Nsùyrì Nyùy 39

¹[45] Mò‑oò shìvìr jii, «M yíi a tiír kiwúu kém, a fìʼ, ji lá m yòʼ a suúy kinyo ke dzə̀ kí wày mo é jay. Mo wír ve á méŋ wòo dzə̀ə́ e mǒ si, m yíi sətí shuu wóm.»

²Bó m yòʼ‑oò lo mvə̀ʼ shuu wóm féyì, fə̀m shishàr. M ghár shilív shém, la kinyo ke juŋ ki yòʼ fə̀m a dzə. Ŋgeʼ sém sí kú a joònè joònèn,

³shilív shí wáa baarí mo baárín. Kù mo m kwaʼtì bèy, ŋgeʼ si wáa dzə̀r dzə̀rìn e mǒ kitu. M nèn a suŋnín, a suúy jii,

⁴«Éè NYÙY TÀR, ku yiì, é m kiíy mo m wíy dzə̀ʼə̀m, e dù meé. Yiì, é m kiíy mo vishiíy vém ví berin é kitu ke nsay, e kiíy mo kintsə̀m kém ké dzə̀ʼə̀m ki berin ne.»

⁵Rúrú, à fò ne mo vishiíy vishàr. Dzəʼə̀m yémé mèé e gha e wò si? Rúrú, dzəʼə̀m wìri kù dzə̀ kiyúy.

⁶Wíri ghán e yuv, a dzəʼə̀m yéví dzə̀ moo kindzə̀ə́ndzəm bèy. Á gar gàrìn, aá kù gar kisáŋ. Wìr lo, wù bàʼtí bùʼ, a bó wù yòʼ kì wír wo wù wíy yi vitsə́ʼ və́.

⁷Éè NYÙY TÀR, m yòʼ kfə̀n yuúri a dzə̀ la lèn? Vifií vém ví kù sí tíy a dzə̀ e wò wùn.

⁸Ku fə̀ə́r mo fó lǒn vinyò ve m jayin e wò. Lá à yòʼ yiì, é viyúŋ ví li mo ji kifá ke nshéʼmé.

⁹Bó yòʼ dzə̀ m mvə̀ʼ shuu wóm ji m suúy á kinyo, bìʼ fo dzəə̀n wò wo à yiìn ji m wáa yen ŋgeʼ.

¹⁰Ku tsə̀ʼ nyár ye à màʼàn e mǒ kituu. Wúné wèʼ ne mo wéʼen bìʼ kindzəv ke à yuyin mo shó.

¹¹À lo, à sàʼ wír, e màʼ ŋgeʼlàʼ e wun kitu, maʼà, à laàr vijuŋ ve ŋgaàŋ mo séʼ si là ndzə̀y. Rúrú, dzəʼə̀m wìr dzə̀me kù dzə̀ kiyúy.

¹²Éè NYÙY TÀR, ku yù bunrì yémé. Yú tóŋ yémé, e sə̀ mo mo à yuun a m diyì. M dzə̀ kiŋgàn ké, ke kinyè kí yòʼ lum e ntaʼ. M kù dzə̀ beèshaà mo atàr vémé‑eè dzəə̀n.

¹³Lá à yòʼ dzəə lèéy mo e rə́r se bi sí. Ku màʼtì shilív shém shí nyaáŋ fo shintàm shìn, é bo m wiy màʼtì nsay rə̀n, e dù ŋkuuŋkùŋ.