Read Lamnso Nsùyrì Nyùy 40 Bible Online

Nsùyrì Nyùy 40 - Lamnso bible

Nsùyrì Nyùy 40

¹[46] Mò‑oò dzə́ ji nyaáŋ, yuúri a dzə̀ NYÙY TÀR, wù fó vituʼùr e mò, e yù tóŋ yém.

²Wù fəə́r mo fó bií kishàʼàr, fo kishàʼàr keé shàʼ, e tìír mo a dzə̀ é kitu ke kilan, m wáa ghan là kinyo ké a fàn.

³Wù wày ne luŋ wo fíyi e mǒ shuù, a m wíy a yòv, a sùyrì wun woo Nyùy wòsən shó. Wíri wíy yen anín, é shúu má áwune, aá tiír vifií a dzə̀ e NYÙY TǍR wùn.

⁴Bòŋ ké wìr wo wù tiir vifií a dzə̀ e NYÙY TǍR wùn, a bó wù yòʼ biʼnìn vé kiŋkoʼòrwùné, kìn wír ve á jayin dzə́ə, a jùmrì anyùy kisaŋe.

⁵Éè NYÙY TÀR, woo Nyùy wom, wìr yòʼ dzə̀ shó wo a dzə̀ wù fìʼsìn kitú kfə́ vèn wun. À dzə̀sì ne viŋgaʼnìn ve lìm ve à yii e vèr. Vinyo ve à sìysìn bìʼ ver ví dzə̀ vigháʼán. A yì‑iì dzə̀ ji m wáa fìʼtì, a suúy mo ví dzəə̀n, bo a dzə̀ ví shaà mo dzə̀ á tàŋ.

⁶Bó à yòʼ kér shií é nyàm se á cu wò sho ji ntàŋrí, kìn é fómo wùmòʼ. Bó à yòʼ diy nyám se á ton ji cu, kìn se á seé ji cu ajay. À ló ké, e fò mo a dzə̀ vituʼùr ve ví yú vinyo.

⁷M nen biìmé jii, «Mo á və̀ne. M yèn ne, aá sáŋ é Ŋwàʼ Nsər kinyo ke dzə̀ m yiì.

⁸Éè Nyùy wom, m kér shií fó a yiì kinyo ke à sìysìn. Ntir yè lum e mǒ shiliv.»

⁹M fìʼtì ne sáʼka wò wo juŋ e màŋgòŋ wìr vée mvəm, sáʼka woo ji à luŋèr a wír vé. Éè NYÙY TÀR, à kì ji bó m yòʼ dór fó a fèr.

¹⁰M yòʼ litì fó a fèr mo à yii luŋèr wír vé. M kù sùúy ne e wíri ji à yii tíy a vèsən, luŋèr ver. Bó m yòʼ yar fó a fìʼtì kùm wò e màŋgòŋ wìr vée, a m fer mo à koŋ wír vé e dù, e mày, tíy e kinyò ke à kàʼàn ver shó.

¹¹Éè NYÙY TÀR, lá à yòʼ yàr fóo dìn shammèndzə̀n wò e mò. Kú a dìn koŋ yée e mò, a tiy e mǒ bàm, é m wáa dzə e kiŋsìn ghán sidzə̀m.

¹²Ŋgeʼ si gìŋ ne mo, e tàr, a bó yòʼ dzə̀ á tàŋ. M bùʼtì ne vinyo, lòné koó mo, a bó m yòʼ dzəə́ yén kirə́ʼ. Ajay vémé kùʼ ne, e shaà nə́ŋ see mǒ kitu, shilív shí seém mo séemen.

¹³Éè NYÙY TÀR, kii wò, bòyìr mo, ku yiì cér, e sə̀ mo.

¹⁴Ku màʼ wír ve á taʼ yuyrí moó, aá tátí, a woomé, a tùʼtìn. Ku màʼ wír ve á taʼ lemér moó, maʼà, aá woómé, a leʼkír.

¹⁵Wíri jaʼ mo jii, «Eèhə́ə̀, eèhə́ə̀.» Ku màʼ áwune, aá wáa woomé.

¹⁶Yii bèy, ku yiì, é wír ve á kóʼti e wò sii wáa sheʼrí. Ku yiì, aá wáa sheʼrí adzə̀m, a yu vijuŋ vé. Wír ve á shéʼri mo à luŋèr wírií kú a kwa wò. Á kú a yòŋ ghán sidzə̀m jii, «NYÙY TÀR dzə̀ e gháʼtín.»

¹⁷M dzə̀ ben, a m dzə̀ ŋgaà kitàn, a dzə ghéʼncey, a NYÙY TÀR kù kuúme mo. Éè Nyùy wom, à dzə̀ ŋgaà sə wom, a dzə Mfə̀ə́r wom. Lá à yòʼ ndzə̀y fóo sə mo.