Read Lamnso Nsùyrì Nyùy 41 Bible Online

Nsùyrì Nyùy 41 - Lamnso bible

Nsùyrì Nyùy 41

¹[47] Bòŋ ké wìr wo wù din shií fo aŋgàa kitàne, NYÙY TÀR yíi bòyìr wun e ghan se wù dzəə̀n é ŋgeʼ.

²Wù yíi a kìŋsìn wun, a lèm dzəʼə̀m rə́ shó, a ŋwèrín kù yíi a ker kisəəvì é wòŋ woo Isray, a bó yòʼ dzə̀ NYÙY TÀR màʼtì ji aŋgaà və́ vibàné maʼ wun e nsay.

³NYÙY TÀR yíi a leéy fo wun e wun kikun ké yàsí, a fèr ayàsí və́ adzə̀m.

⁴Éè NYÙY TÀR, fo kém kí, mò‑oò tuùné ne ji m yiì ne a kinyo ke bi kí e wò. Ku shàm mendzən mem mè, e yiì, é m bónén.

⁵Yii bèy, aŋgaà vém vibàné kù leey mo a dzə̀ e shilív she bi shí. Á keŋ jii, «Wù fèn wíy kpu e ghàn ka, ye yír rəə́ lay?»

⁶Wìr baŋrìn wiy, leey mo, wù wàa suŋnín lám e baà, a baʼtí a dzə̀ kighèʼ e mǒ bàm, fəə́, wù wàa sàmèr vitóŋtóŋ vidzə̀m.

⁷Wír ve á ban moó báʼti, á kù a sə̀mnìn kùm mo. Á kù kwaʼtì a dzə̀ vinyo ve bi ví e mǒ bàm.

⁸Á kù samèr mo e wíri jii, «Ke ghaʼán kí kòóy ne wun lán. Wù gbù ne yàsí wo bó wù yòʼ yíi lò e yuv.»

⁹Fə̀m ŋkar yem tìm kù shòʼ ne sa e mǒ bàm, ŋkar yem ye mò‑oò wayin shilív é wùn wó feyì, a vèr wun‑eè yíkir kighín kimòʼón.

¹⁰Éè NYÙY TÀR, rə́r mendzən mem mè. Ku yiì, é m bónén. M bónenè, é m siir ŋkfə́tír áàŋgaà vém vibàné.

¹¹A m kì féyì ji à leey a mo, koŋ mo, bìʼ fo aŋgaà vém vibàné yoʼ màʼ mo.

¹²À sə̀ ne mo fo m gbu, bìʼ fo m yii kinyo kee tìítiy, aà kù yíi lèm mo fo à dzəə̀n ghán sidzə̀m.

¹³Búríi wáa dzə fo NYÙY TÀR, Nyùy woó Isray. Á kú a burí wun ghán sidzə̀m, e dù, e jòʼsì. Amen, Amen.