Read Lamnso Nsùyrì Nyùy 42 Bible Online

Nsùyrì Nyùy 42 - Lamnso bible

Nsùyrì Nyùy 42

¹[48] Mo nyàm yee njà ghán taʼ ndzə́v ye yí léŋ, rəsìnè, éè NYÙY TÀR, kù dzə̀ sá réŋréŋ mo m kér shii wò.

²M yár jiŋ Nyùy wo wù dzəə̀n e tin. M wíy dù e wun lav e ghàn ka? M wíy a sùyrì wun fo e ghàn ka?

³Viyíkìr vém ví kù jòʼsì ne mensíy. M kù diy dìyìn e shùy, diy vitsə́ʼə́, a wíri kù jaʼ mo ghán sidzə̀m jii, «Nyùy wò tèn fóo sə wò bìʼ ka?»

⁴M lóo kuumé vinyo vìn, shilív shém shí wàa tàʼ, e tum. Kuúmé mo vèr à màŋgòŋ‑eè duùn é lav cù, a m du fo mbìy, aá jumrì mo fó bàm, a vèr à vé ŋkàʼá waáme yòv vibeèrì fo Nyùy, a wúné tékir ver.

⁵M dzə́ mendzən mendzən bèn bìʼ ka? M rəəy bèn bìʼ ka? M kù‑úù wáa dzə, a yuurí a dzə̀ Nyùy. M kì ji m kù dzəə́ wìy a sùyrì wun, wun woo Nyùy woo Ŋgaà Lùŋèr wom.

⁶M kù sí dzə́ feyì mendzən mendzən. Bìʼ bey, m kù yíi a kuumé wò, a toŋ wò, a toŋ wò fo Taa Jordan fèn, fo wòŋ Gwan Hermon, à woo Misari.

⁷Ŋgeʼ si kù wiy mo, tóm ŋgeʼ, yor mo gbu kóŋ, tsə́yninè. À yiì ne, ŋgeʼ si wíy moo ndzə́v, e sùm mo.

⁸NYÙY TÀR ku dìn koŋ ye wù kér fo wír vəə́ e mò. Wù ku dìn e mò e shùy, é m wáa yòv luŋ vitsə́ʼə́, a sùyrì wun, é wáa dzə bunrì ye m bunrì Nyùy wo wù foon mo dzəʼə̀m.

⁹M suuy e Nyùy wo dzəə̀n kilán kém jii, «À làysìn mo bìʼ ka? Aŋgaà vém vibàné nyavrì e mò, à máʼtí, m wáa dìy ji ka?»

¹⁰Aŋgàa vibàn vémé shur mo, e liy si, a m koó mo á sòv kiváv ké wìr e njoŋ kifa. Á jaʼ mo jáʼan jii, «Nyùy wò tèn fóo sə wò bìʼ ka?»

¹¹M dzə́ mendzən mendzən bèn bìʼ ka? M rəəy bèn bìʼ ka? M kù‑úù wáa dzə, a yuurí a dzə̀ Nyùy. M kì ji m kù dzəə́ wìy a sùyrì wun, wun woo Nyùy woo Ŋgaà Lùŋèr wom.[49]