Read Lamnso Nsùyrì Nyùy 44 Bible Online

Nsùyrì Nyùy 44 - Lamnso bible

Nsùyrì Nyùy 44

¹[52] Éè Nyùy, vèr yù ne e vituʼùr vér ví, aàtàr vérí‑iì fèr ne e vèr vinyo ve wò‑oò yiìn aáwuné ghan, viŋgaʼnìn ve vinyò ve wò‑oò yiìn fó yàŋgùʼ.

²Wò‑oò jùm vitúm e vitaáví vé vi, e dzə̀ʼə̀r atàr vér aáwuné nsay. Wò‑oò màʼ ŋgeʼ e vitúm vìn vi, e yiì, atàr vérí táʼám fó.

³Áwune yòʼ‑oò lo koò nsay rə̀n, a dzə̀ e rə́r sí, a bó áwune yòʼ‑oò lo sò e vitaáví vév ví. Kù‑uù dzə̀ cáʼ vitaáví vé. Kù‑uù dzə̀ wò kóy wóv wo tavíné. Wò‑oò dzə́ aáwuné mvəm, din koŋ yé, aá warkìrì.

⁴À dzə̀ fon wom, e kfə̀n a dzə Nyùy wom. Kù yii wò, é bo rám Jakovi wáa tòn wíri.

⁵Vèr ton aŋgaà vér vibàn bìʼ wò, nyeŋrì áwune bìʼ vitaáví vé.

⁶M yòʼ wáy vifií e mǒ kinte, a bó yòʼ dzə̀ nyùy yem rə̀r sə̀ mo.

⁷Kù boyìr wò ver fo aŋgàa vibàn vérí wo. Kù yii wò, aáwune woóme.

⁸Rúrú, Nyùy, vèr saa wún bìʼ wò ghán sidzə̀m, a vèr yíi a burí yír yé, e dù, e jòʼsì.

⁹Yii bèy, à lò ne, e màʼày ver, e shòór. À màʼtì ne amànjòŋ vér, á wáa jaáy e shùu rər.

¹⁰Vèr fəə̀ ne rə́r, sí dú, e kfə̀n é nsàm, aŋgàa vibàn vérí súm vifá vér.

¹¹À yiì ne, vèr wáa dzə moo njiì wo á sí du, e see, e kfə̀n tàʼár ver e vitúm vee kwaʼda ví mvəm.

¹²À fiìnè ne wír vé, á nəə́ é vikwàn, aà fiíné ver là ndzə̌n kav. Bo ver á ka?

¹³À yiì ne, wír vee věr ghaŋe wáa sə̀ʼ ver. Vitúm ve ví gìŋèn ver ví wáa jàʼ ver, a ŋway.

¹⁴À yiì ne, vitúm vi lí ver ji awàʼ vév kilelé, e yiì, áwune wáa sheʼ ver adzə̀m adzə̀m.

¹⁵M kù jòʼsì ne a dzə̀ é nshoórmé, a woómé si sum mo súmen.

¹⁶Á səʼ mo, shur mo e liy si ghán sidzə̀m, aàŋgaà vém vibàn wùn à vé kighèʼe kù giŋ mo gíŋen.

¹⁷Vinyo vìn vidzə̀m vi‑iì kòóy ver, a bó vèr yòʼ‑oò lo làysìn wò. Vèr yòʼ‑oò lo yàʼáy *mensaŋ mè.

¹⁸Vèr yòʼ‑oò lo bìn ndzə̀m e wò, a bó vèr yòʼ‑oò lo shòʼór nsər yè,

¹⁹é bo à maʼti ver ji kuúrá saʼti, e yiì, ndzə sə́n e věr kitu ji dzə̀v.

²⁰A vèr‑iì làysìn Nyùy wor, e kòytí anyùy kisaŋe,

²¹wù wàa meŋ à? Bó wù yòʼ kì kilìtì kee wìr shiliv a?

²²Éè Nyùy wor, kpúu siʼìr ver vishiíy vidzə̀m bìʼ wò, a vèr sì moo njiì wo á sí du, e see.

²³NYÙY TÀR, yìmène. Kí ghàn é le, bo à wáa buuné? Yìmène, e taàmé aŋgaà vér vibàné. Lá à yòʼ màʼày ver ŋkuuŋkùŋ.

²⁴À lìr fo vèr bìʼ ka? À búʼur fo věr nyar, búʼur fo věr ŋgeʼ bìʼ ka?

²⁵Vèr sí néŋnin a dzə̀ é kibvə̀r. À màʼ ne ver, vèr gbú, e gòʼ fo.

²⁶Ku wìy cér, e sə̀ ver. Ku bòyìr ver bìʼ koŋ ye à kér fo wír vée.