Read Lamnso Nsùyrì Nyùy 45 Bible Online

Nsùyrì Nyùy 45 - Lamnso bible

Nsùyrì Nyùy 45

¹[53] Jí se juŋ si rùn ne shilív shém, kù mo m fer yòv wo á yíi a yòv, a burí fon sho. Kiliímé kém kí sì kibáʼtín, kibáʼtín moo kicí ké saŋ ke ŋgaà saŋ, ŋgaà saŋ wo wù kiìn sáŋ kijuŋ.

²Nyàr, á dzə̀ á wánlè nsùm, aá tò á sí. Á kì á kisúŋnìn feyì feyì. Nyùy bùʼ a ne wun e kisəəvì kee là may ki.

³Éè Lumnyàm, á báʼtí á nyùy rə rə̀r, e wàv. Á dzə̀ á fon wo kuʼùn, aá yii a vinyo ve viwìr vi.

⁴Á kóʼ á nyám rə moo fon wo ghaʼán. Á fəə́, e tòn a aŋgaà və́ vibàn. Á tóm á suuyrú, e tòm á kinyo ke á tínen là kiloʼ. Á ku dìn a viŋgaʼnìn və́ vé vinyò, vinyo ve á yii e kóy və́ wo tavíné.

⁵Mvən se fòn si njím a ŋàŋ, té melív me aŋgàa vibàn və́, tósinè, a wíri gbú a e wun sar.

⁶Á dzə̀ Nyùy, a sáʼ rəə́ kù wíy a tiy a fo, e dù, e jòʼsì.[54] Sáʼ rə́ vifòne dzə̀ á sáʼ yee là kiloʼ.

⁷Á kù koŋ a dzə̀ vinyo ve réŋ ví, ban yii ye bií. Á nsàv a ye Nyùy woo Nyùy və shoʼon á wun, e yòʼ, á wáa yu a vijuŋ e shaà a awàʼ və́ adzə̀m.

⁸Kirəm ke bìʼ ye juujùŋ ki rəm, rəʼtìn a fo wun ndzə̀y, biʼ yee *mer, yee *alo, à yee *kaasiàa, aá rə́si e ntoʼ a dzə̀ ye á naŋsin e sóŋ sé kitàm si, a vé yòvi yov, shéʼer a wun.

⁹Vikǐy ntoʼo dzə̀, aámóʼó kù dzə̀ wón ntoʼ símóʼ sí, a wiiy ntoʼ wo fíy tíy kàvàʼ fo koy yìyí, aá wáyrí ne wun e vifá ve sùsù ve á fèrìn e *kisha ke mbàm ke baar kí.

¹⁰Éè wiiy ntoʼ woo jín, fó vituʼùr ví, e yuùrí jí yem. Làysìn wír véné, làysìn à kfə́ə yéné,

¹¹é fòn wáa ker shií wò bìʼ tókír ye à tókirì. Sí kér wun wò, á yunín wun.

¹²Wír veé Tayàa yíi fo wò afómo, áàŋgàa mbàme wáa rəsí wò, a fo njùnkìtu.

¹³Wiiy ntoʼ wo fíy sì é ntoʼ, a wù boŋ, njaʼkìrì. Á tsə̀m ndzə̀y sə́ e làv kishà ke mbàm ke baar kí.

¹⁴Wónlě ŋgòn ve á lim fo wune tsəə́ne wun, tsəə́ne, du sho e fòn si, a ndzə̀y sí njaʼkìr fo wùn wó njáʼkin.

¹⁵Á nəə fo fòn dzəə̀n, a wúné boŋ áwune, aá shéʼri shèʼrín.

¹⁶Nyàr, wón ntoʼo kù wíy a dzə vé a yi vifon, aá wíy a lèm a áwune ji vé saʼa kitú ke nsay kidzə̀m.

¹⁷Yòv wom kù wíy a koʼór a yír fòn mo ŋgwàʼ si wíy a koʼ, a wìr dzə̀m kù wíy a burí a wun viyá viyá là may.