Read Lamnso Nsùyrì Nyùy 46 Bible Online

Nsùyrì Nyùy 46 - Lamnso bible

Nsùyrì Nyùy 46

¹[55] Nyùy dzə̀ kikiŋ kér, a kù dzə̀ wun vitaáví vér. Wù dzə̀ e věr mentsə̀m, sə́ ver é ghan sé ŋgeʼ.

²A fə̀m dzə̀ ji nsay səʼsi, áàgwane keesi, e meé e sar rìbà ndzə̀v,

³a rìbà ndzə̀v fə̀m yorkìr, tsə́yninè, nsay wáa sə̀ʼsì, aàgwane shó, bo bó yòʼ dzə̀ vèr wàa fàn.

⁴Ndzə́ví dzə̀ ye yí yii, a kishéʼrì ki dzə́ e ŋkàlaʼ ye dzəə̀n ye Nyùy. Ŋkàlaʼ ye ranén ye dzəə̀n kirə́ʼ ké dzə ke wun woo Taà Vitu.

⁵Nyùy dzə́ e ŋkàlaʼ fèn, a bó yòʼ dzə̀ á laàr. Ndzə ráné, Nyùy kù sə̀ ŋkàlaʼ rə̀n, yì bòy.

⁶Vitúm vi fan, yaʼà, a sáʼ yéví sí gbu. NYÙY TÀR súŋninè, kitú ke nsay ki yaàné é njà vilù.

⁷NYÙY TÀR woo Taà Mànjòŋ dzə̀ vèr áwune. Wun woo Nyùy Jakov dzə̀ kikiŋ kér.

⁸Vèn wiy, e yèn búʼú kinyo ke NYÙY TÀR yiìn kí. Vèn yén ri virə́ʼ ve wù laàrìn fó nsay vi.

⁹Wù mayìr rə́r fó kitu ke nsay, béʼti vinte, kívti kòŋ sí kivtín, ton *viténtén vé rər e və́yí.

¹⁰Nyùy suuy jii, «Vèn yar vindzəʼ vi, a kiíy ji m dzə̀ Nyùy. Sáʼ mo vitúm vidzə̀m. Kù kér mo kitú ke nsay.»

¹¹NYÙY TÀR woo Taà Mànjòŋ dzə̀ vèr áwune. Wun woo Nyùy Jakov dzə̀ kikiŋ kér.