Read Lamnso Nsùyrì Nyùy 47 Bible Online

Nsùyrì Nyùy 47 - Lamnso bible

Nsùyrì Nyùy 47

¹[56] Vitúm vidzə̀m vi wáa kwaʼ wó yév, a buʼ shirəə́, a kwa Nyùy kitávín.

²NYÙY TÀR woo Taà Vitu shaà vitaáví. Wù dzə̀ Fon wo wiy, a sáʼ wun kitú ke nsay kidzə̀m.

³Wù‑uù yiì, vèr tón aŋgaà vér vibàn. Wù wáy vitúm e věr wo, vèr wáa saʼ.

⁴Wù‑uù fò ver nsay, nsay ye wù‑uù shoʼon ji vitsə́ʼ vér. Kù dzə̀ viwìr ve wón Jakov, wón Jakov ve dzəə̀n rám ye wù koŋ e ŋàŋ.

⁵Nyùy kóʼ e wun kàvàʼ, a vé yòvi kwá wun, búʼ shirəə́, a vé sòŋé tóŋ sóŋ.

⁶Á wáa yòv, a sùyrì Nyùy. Á wáa burí wun. Á wáa yòv, a sùyrì fon wòsən. Á wáa burí wun.

⁷Nyùy dzə̀ Fon, a kér wun kitú ke nsay kidzə̀m. Á wáa yòv, a kwa wun.

⁸Nyùy dzə́ e kàvàʼ. Wù dzə́ e wun kàvàʼ wo ranén, a sáʼ wun vitúm vidzə̀m.

⁹Atǎr saʼ veé wòŋ adzə̀me báʼtí, á báʼti ji wír Nyùy wo Abraham ghvə́mé. Kù kér wun atǎr saʼ veé kitu ke nsay adzə̀m. Yír rəə́ dzə̀ e gháʼtín.